ଶ୍ରୀକୃଷ୍ଣ ଉଵାଚ |
ମତ୍ତସିଂଧୁରମସ୍ତକୋପରି ନୃତ୍ଯମାନପଦାଂବୁଜଂ
ଭକ୍ତଚିଂତିତସିଦ୍ଧିଦାନଵିଚକ୍ଷଣଂ କମଲେକ୍ଷଣମ୍ |
ଭୁକ୍ତିମୁକ୍ତିଫଲପ୍ରଦଂ ଭଵପଦ୍ମଜାଚ୍ଯୁତପୂଜିତଂ
କୃତ୍ତିଵାସସମାଶ୍ରଯେ ମମ ସର୍ଵସିଦ୍ଧିଦମୀଶ୍ଵରମ୍ || ୧ ||
ଵିତ୍ତଦପ୍ରିଯମର୍ଚିତଂ କୃତକୃଚ୍ଛ୍ରତୀଵ୍ରତପଶ୍ଚରୈଃ
ମୁକ୍ତିକାମିଭିରାଶ୍ରିତୈର୍ମୁନିଭିର୍ଦୃଢାମଲଭକ୍ତିଭିଃ |
ମୁକ୍ତିଦଂ ନିଜପାଦପଂକଜସକ୍ତମାନସଯୋଗିନାଂ
କୃତ୍ତିଵାସସମାଶ୍ରଯେ ମମ ସର୍ଵସିଦ୍ଧିଦମୀଶ୍ଵରମ୍ || ୨ ||
କୃତ୍ତଦକ୍ଷମଖାଧିପଂ ଵରଵୀରଭଦ୍ରଗଣେନ ଵୈ
ଯକ୍ଷରାକ୍ଷସମର୍ତ୍ଯକିନ୍ନରଦେଵପନ୍ନଗଵଂଦିତମ୍ |
ରକ୍ତଭୁଗ୍ଗଣନାଥହୃଦ୍ଭ୍ରମରାଂଚିତାଂଘ୍ରିସରୋରୁହଂ
କୃତ୍ତିଵାସସମାଶ୍ରଯେ ମମ ସର୍ଵସିଦ୍ଧିଦମୀଶ୍ଵରମ୍ || ୩ ||
ନକ୍ତନାଥକଳାଧରଂ ନଗଜାପଯୋଧରନୀରଜା-
-ଲିପ୍ତଚଂଦନପଂକକୁଂକୁମପଂକିଲାମଲଵିଗ୍ରହମ୍ |
ଶକ୍ତିମଂତମଶେଷସୃଷ୍ଟିଵିଧାଯକଂ ସକଲପ୍ରଭୁଂ
କୃତ୍ତିଵାସସମାଶ୍ରଯେ ମମ ସର୍ଵସିଦ୍ଧିଦମୀଶ୍ଵରମ୍ || ୪ ||
ରକ୍ତନୀରଜତୁଲ୍ଯପାଦପଯୋଜସନ୍ମଣିନୂପୁରଂ
ପତ୍ତନତ୍ରଯଦେହପାଟନପଂକଜାକ୍ଷଶିଲୀମୁଖମ୍ |
ଵିତ୍ତଶୈଲଶରାସନଂ ପୃଥୁଶିଂଜିନୀକୃତତକ୍ଷକଂ
କୃତ୍ତିଵାସସମାଶ୍ରଯେ ମମ ସର୍ଵସିଦ୍ଧିଦମୀଶ୍ଵରମ୍ || ୫ ||
ଯଃ ପଠେଚ୍ଚ ଦିନେ ଦିନେ ସ୍ତଵପଂଚରତ୍ନମୁମାପତେଃ
ପ୍ରାତରେଵ ମଯା କୃତଂ ନିଖିଲାଘତୂଲମହାନଲମ୍ |
ତସ୍ଯ ପୁତ୍ରକଳତ୍ରମିତ୍ରଧନାନି ସଂତୁ କୃପାବଲାତ୍
ତେ ମହେଶ୍ଵର ଶଂକରାଖିଲ ଵିଶ୍ଵନାଯକ ଶାଶ୍ଵତ || ୬ ||
ଇତି ଶ୍ରୀଶିଵମହାପୁରାଣେ ଶ୍ରୀକୃଷ୍ଣକୃତ ଶ୍ରୀଶିଵପଂଚରତ୍ନସ୍ତୁତିଃ |