ଅସ୍ଯ ଶ୍ରୀ ଶିଵରକ୍ଷାସ୍ତୋତ୍ରମଂତ୍ରସ୍ଯ ଯାଜ୍ଞଵଲ୍କ୍ଯ ଋଷିଃ | ଶ୍ରୀ ସଦାଶିଵୋ ଦେଵତା | ଅନୁଷ୍ଟୁପ୍ ଛଂଦଃ | ଶ୍ରୀ ସଦାଶିଵପ୍ରୀତ୍ଯର୍ଥଂ ଶିଵରକ୍ଷାସ୍ତୋତ୍ରଜପେ ଵିନିଯୋଗଃ ||
ଚରିତଂ ଦେଵଦେଵସ୍ଯ ମହାଦେଵସ୍ଯ ପାଵନମ୍ |
ଅପାରଂ ପରମୋଦାରଂ ଚତୁର୍ଵର୍ଗସ୍ଯ ସାଧନମ୍ || ୧ ||
ଗୌରୀଵିନାଯକୋପେତଂ ପଂଚଵକ୍ତ୍ରଂ ତ୍ରିନେତ୍ରକମ୍ |
ଶିଵଂ ଧ୍ଯାତ୍ଵା ଦଶଭୁଜଂ ଶିଵରକ୍ଷାଂ ପଠେନ୍ନରଃ || ୨ ||
ଗଂଗାଧରଃ ଶିରଃ ପାତୁ ଫାଲମର୍ଧେଂଦୁଶେଖରଃ |
ନଯନେ ମଦନଧ୍ଵଂସୀ କର୍ଣୌ ସର୍ପଵିଭୂଷଣଃ || ୩ ||
ଘ୍ରାଣଂ ପାତୁ ପୁରାରାତିଃ ମୁଖଂ ପାତୁ ଜଗତ୍ପତିଃ |
ଜିହ୍ଵାଂ ଵାଗୀଶ୍ଵରଃ ପାତୁ କଂଧରାଂ ଶିତିକଂଧରଃ || ୪ ||
ଶ୍ରୀକଂଠଃ ପାତୁ ମେ କଂଠଂ ସ୍କଂଧୌ ଵିଶ୍ଵଧୁରଂଧରଃ |
ଭୁଜୌ ଭୂଭାରସଂହର୍ତା କରୌ ପାତୁ ପିନାକଧୃକ୍ || ୫ ||
ହୃଦଯଂ ଶଂକରଃ ପାତୁ ଜଠରଂ ଗିରିଜାପତିଃ |
ନାଭିଂ ମୃତ୍ଯୁଂଜଯଃ ପାତୁ କଟିଂ ଵ୍ଯାଘ୍ରାଜିନାଂବରଃ || ୬ ||
ସକ୍ଥିନୀ ପାତୁ ଦୀନାର୍ତଶରଣାଗତଵତ୍ସଲଃ |
ଊରୂ ମହେଶ୍ଵରଃ ପାତୁ ଜାନୁନୀ ଜଗଦୀଶ୍ଵରଃ || ୭ ||
ଜଂଘେ ପାତୁ ଜଗତ୍କର୍ତା ଗୁଲ୍ଫୌ ପାତୁ ଗଣାଧିପଃ |
ଚରଣୌ କରୁଣାସିଂଧୁଃ ସର୍ଵାଂଗାନି ସଦାଶିଵଃ || ୮ ||
ଏତାଂ ଶିଵବଲୋପେତାଂ ରକ୍ଷାଂ ଯଃ ସୁକୃତୀ ପଠେତ୍ |
ସ ଭୁକ୍ତ୍ଵା ସକଲାନ୍ କାମାନ୍ ଶିଵସାଯୁଜ୍ଯମାପ୍ନୁଯାତ୍ || ୯ ||
ଗ୍ରହଭୂତପିଶାଚାଦ୍ଯାଃ ତ୍ରୈଲୋକ୍ଯେ ଵିଚରଂତି ଯେ |
ଦୂରାଦାଶୁ ପଲାଯଂତେ ଶିଵନାମାଭିରକ୍ଷଣାତ୍ || ୧୦ ||
ଅଭଯଂକରନାମେଦଂ କଵଚଂ ପାର୍ଵତୀପତେଃ |
ଭକ୍ତ୍ଯା ବିଭର୍ତି ଯଃ କଂଠେ ତସ୍ଯ ଵଶ୍ଯଂ ଜଗତ୍ତ୍ରଯମ୍ || ୧୧ ||
ଇମାଂ ନାରାଯଣଃ ସ୍ଵପ୍ନେ ଶିଵରକ୍ଷାଂ ଯଥାଽଦିଶତ୍ |
ପ୍ରାତରୁତ୍ଥାଯ ଯୋଗୀଂଦ୍ରୋ ଯାଜ୍ଞଵଲ୍କ୍ଯଃ ତଥାଽଲିଖତ୍ || ୧୨ ||
ଇତି ଶ୍ରୀଯାଜ୍ଞଵଲ୍କ୍ଯପ୍ରୋକ୍ତଂ ଶିଵରକ୍ଷାସ୍ତୋତ୍ରମ୍ |