ପଶୂନାଂ ପତିଂ ପାପନାଶଂ ପରେଶଂ
ଗଜେଂଦ୍ରସ୍ଯ କୃତ୍ତିଂ ଵସାନଂ ଵରେଣ୍ଯମ୍ |
ଜଟାଜୂଟମଧ୍ଯେ ସ୍ଫୁରଦ୍ଗାଂଗଵାରିଂ
ମହାଦେଵମେକଂ ସ୍ମରାମି ସ୍ମରାରିମ୍ || ୧ ||
ମହେଶଂ ସୁରେଶଂ ସୁରାରାତିନାଶଂ
ଵିଭୁଂ ଵିଶ୍ଵନାଥଂ ଵିଭୂତ୍ଯଂଗଭୂଷମ୍ |
ଵିରୂପାକ୍ଷମିଂଦ୍ଵର୍କଵହ୍ନିତ୍ରିନେତ୍ରଂ
ସଦାନଂଦମୀଡେ ପ୍ରଭୁଂ ପଂଚଵକ୍ତ୍ରମ୍ || ୨ ||
ଗିରୀଶଂ ଗଣେଶଂ ଗଲେ ନୀଲଵର୍ଣଂ
ଗଵେଂଦ୍ରାଧିରୂଢଂ ଗୁଣାତୀତରୂପମ୍ |
ଭଵଂ ଭାସ୍ଵରଂ ଭସ୍ମନା ଭୂଷିତାଂଗଂ
ଭଵାନୀକଲତ୍ରଂ ଭଜେ ପଂଚଵକ୍ତ୍ରମ୍ || ୩ ||
ଶିଵାକାଂତ ଶଂଭୋ ଶଶାଂକାର୍ଧମୌଳେ
ମହେଶାନ ଶୂଲିନ୍ ଜଟାଜୂଟଧାରିନ୍ |
ତ୍ଵମେକୋ ଜଗଦ୍ଵ୍ଯାପକୋ ଵିଶ୍ଵରୂପଃ
ପ୍ରସୀଦ ପ୍ରସୀଦ ପ୍ରଭୋ ପୂର୍ଣରୂପ || ୪ ||
ପରାତ୍ମାନମେକଂ ଜଗଦ୍ବୀଜମାଦ୍ଯଂ
ନିରୀହଂ ନିରାକାରମୋଂକାରଵେଦ୍ଯମ୍ |
ଯତୋ ଜାଯତେ ପାଲ୍ଯତେ ଯେନ ଵିଶ୍ଵଂ
ତମୀଶଂ ଭଜେ ଲୀଯତେ ଯତ୍ର ଵିଶ୍ଵମ୍ || ୫ ||
ନ ଭୂମିର୍ନ ଚାପୋ ନ ଵହ୍ନିର୍ନ ଵାଯୁ-
-ର୍ନ ଚାକାଶମାସ୍ତେ ନ ତଂଦ୍ରା ନ ନିଦ୍ରା |
ନ ଚୋଷ୍ଣଂ ନ ଶୀତଂ ନ ଦେଶୋ ନ ଵେଷୋ
ନ ଯସ୍ଯାସ୍ତି ମୂର୍ତିସ୍ତ୍ରିମୂର୍ତିଂ ତମୀଡେ || ୬ ||
ଅଜଂ ଶାଶ୍ଵତଂ କାରଣଂ କାରଣାନାଂ
ଶିଵଂ କେଵଲଂ ଭାସକଂ ଭାସକାନାମ୍ |
ତୁରୀଯଂ ତମଃପାରମାଦ୍ଯଂତହୀନଂ
ପ୍ରପଦ୍ଯେ ପରଂ ପାଵନଂ ଦ୍ଵୈତହୀନମ୍ || ୭ ||
ନମସ୍ତେ ନମସ୍ତେ ଵିଭୋ ଵିଶ୍ଵମୂର୍ତେ
ନମସ୍ତେ ନମସ୍ତେ ଚିଦାନଂଦମୂର୍ତେ |
ନମସ୍ତେ ନମସ୍ତେ ତପୋଯୋଗଗମ୍ଯ
ନମସ୍ତେ ନମସ୍ତେ ଶ୍ରୁତିଜ୍ଞାନଗମ୍ଯ || ୮ ||
ପ୍ରଭୋ ଶୂଲପାଣେ ଵିଭୋ ଵିଶ୍ଵନାଥ
ମହାଦେଵ ଶଂଭୋ ମହେଶ ତ୍ରିନେତ୍ର |
ଶିଵାକାଂତ ଶାଂତ ସ୍ମରାରେ ପୁରାରେ
ତ୍ଵଦନ୍ଯୋ ଵରେଣ୍ଯୋ ନ ମାନ୍ଯୋ ନ ଗଣ୍ଯଃ || ୯ ||
ଶଂଭୋ ମହେଶ କରୁଣାମଯ ଶୂଲପାଣେ
ଗୌରୀପତେ ପଶୁପତେ ପଶୁପାଶନାଶିନ୍ |
କାଶୀପତେ କରୁଣଯା ଜଗଦେତଦେକ-
-ସ୍ତ୍ଵଂ ହଂସି ପାସି ଵିଦଧାସି ମହେଶ୍ଵରୋଽସି || ୧୦ ||
ତ୍ଵତ୍ତୋ ଜଗଦ୍ଭଵତି ଦେଵ ଭଵ ସ୍ମରାରେ
ତ୍ଵଯ୍ଯେଵ ତିଷ୍ଠତି ଜଗନ୍ମୃଡ ଵିଶ୍ଵନାଥ |
ତ୍ଵଯ୍ଯେଵ ଗଚ୍ଛତି ଲଯଂ ଜଗଦେତଦୀଶ
ଲିଂଗାତ୍ମକେ ହର ଚରାଚରଵିଶ୍ଵରୂପିନ୍ || ୧୧ ||
ଇତି ଶ୍ରୀମତ୍ପରମହଂସ ପରିଵ୍ରାଜକାଚାର୍ଯ ଶ୍ରୀମଚ୍ଛଂକରାଚାର୍ଯ ଵିରଚିତଂ ଵେଦସାର ଶିଵ ସ୍ତୋତ୍ରଂ ସଂପୂର୍ଣମ୍ |