అవ్యాదజోఽంఘ్రి మణిమాంస్తవ జాన్వథోరూ
యజ్ఞోఽచ్యుతః కటితటం జఠరం హయాస్యః |
హృత్ కేశవస్త్వదుర ఈశ ఇనస్తు కంఠం
విష్ణుర్భుజం ముఖమురుక్రమ ఈశ్వరః కమ్ || ౧ ||
చక్ర్యగ్రతః సహగదో హరిరస్తు పశ్చాత్
త్వత్పార్శ్వయోర్ధనురసీ మధుహాజనశ్చ |
కోణేషు శంఖః ఉరుగాయ ఉపర్యుపేంద్రః
తార్క్ష్యః క్షితౌ హలధరః పురుషః సమంతాత్ || ౨ ||
ఇంద్రియాణి హృషీకేశః ప్రాణాన్ నారాయణోఽవతు |
శ్వేతద్వీపపతిశ్చిత్తం మనో యోగీశ్వరోఽవతు || ౩ ||
పృశ్నిగర్భశ్చ తే బుద్ధిమాత్మానం భగవాన్ హరిః |
క్రీడంతం పాతు గోవిందః శయానం పాతు మాధవః || ౪ ||
వ్రజంతమవ్యాద్వైకుంఠ ఆసీనం త్వాం శ్రియః పతిః |
భుంజానం యజ్ఞభుక్ పాతు సర్వగ్రహభయంకరః || ౫ ||
డాకిన్యో యాతుధాన్యశ్చ కుష్మాండా యేఽర్భకగ్రహాః |
భూతప్రేతపిశాచాశ్చ యక్షరక్షోవినాయకాః || ౬ ||
కోటరా రేవతీ జ్యేష్ఠా పూతనా మాతృకాదయః |
ఉన్మాదా యే హ్యపస్మారా దేహప్రాణేంద్రియద్రుహః || ౭ ||
స్వప్నదృష్టా మహోత్పాతా వృద్ధబాలగ్రహాశ్చ యే |
సర్వే నశ్యంతు తే విష్ణోర్నామగ్రహణభీరవః || ౮ ||
ఇతి శ్రీమద్భాగవతే దశమస్కంధే షష్ఠోఽధ్యాయే బాలరక్షా స్తోత్రమ్ |