శ్రీమన్నందయశోదాహృదయస్థితభావతత్పరో భగవాన్ |
పుత్రీకృతనిజరూపః స జయతి పురతః కృపాళుర్బాలకృష్ణః || ౧ ||
కథమపి రింగణమకరోదంగణగతజానుఘర్షణోద్యుక్తః |
కటితటకింకిణిజాలస్వనశంకితమానసః సదా హ్యాస్తే || ౨ ||
వికసితపంకజనయనః ప్రకటితహర్షః సదైవ ధూసరాంగః |
పరిగచ్ఛతి కటిభంగప్రసరీకృతపాణియుగ్మాభ్యామ్ || ౩ ||
ఉపలక్షితదధిభాండః స్ఫురితబ్రహ్మాండవిగ్రహో భుంక్తే |
ముష్టీకృతనవనీతః పరమపునీతో ముగ్ధభావాత్మా || ౪ ||
నమ్రీకృతవిధువదనః ప్రకటీకృతచౌర్యగోపనాయాసః |
స్వాంబోత్సంగవిలాసః క్షుధితః సంప్రతి దృశ్యతే స్తనార్థీ || ౫ ||
సింహనఖాకృతిభూషణభూషితహృదయః సుశోభతే నిత్యమ్ |
కుండలమండితగండః సాంజననయనో నిరంజనః శేతే || ౬ ||
కార్యాసక్తయశోదాగృహకర్మావరోధకః సదాస్తే |
తస్యాః స్వాంతనివిష్టప్రణయప్రభాజనో యతోఽయమ్ || ౭ ||
ఇత్థం వ్రజపతితరుణీ నమనీయం బ్రహ్మరుద్రాద్యైః |
కమనీయం నిజసూనుం లాలయతి స్మ ప్రత్యహం ప్రీత్యా || ౮ ||
శ్రీమద్వల్లభకృపయా విశదీకృతమేతదష్టకం పఠేద్యః |
తస్య దయానిధికృష్ణో భక్తిః ప్రేమైకలక్షణా శీఘ్రమ్ || ౯ ||
ఇతి శ్రీకృష్ణదాస కృతం శ్రీ బాలకృష్ణాష్టకమ్ |