పాయయ జనమిమమమృతం
దుర్లభమితరస్య లోకస్య |
నతజనపాలనదీక్షిత
మేధాధీదక్షిణామూర్తే || ౧ ||
స్తోతుం వా నంతుం వా
జడవిషయాసక్తహృన్న శక్నోమి |
నైసర్గికీం కురు కృపాం
మయి వటతటవాస దక్షిణామూర్తే || ౨ ||
స్ఫురతు మమ హృది తనుస్తే
పుస్తకముద్రాక్షమాలికాకుంభాన్ |
దధతీ చంద్రార్ధలస-
-చ్ఛీర్షా శ్రీదక్షిణామూర్తే || ౩ ||
సహమాన దక్షిణానన
సహమానవిహీనమత్కమంతుతతీః |
సహమానత్వం త్యజ వా
యుక్తం కుర్వత్ర యద్విభాతి తవ || ౪ ||
మేధాప్రజ్ఞే జన్మమూకోఽపి లోకః
ప్రాప్నోత్యంఘ్రిం పూజయన్యస్య లోకే |
తం పాదాంభోజాతనమ్రామరాళిం
మేధాప్రజ్ఞాదక్షిణామూర్తిమీడే || ౫ ||
గంగానిర్ఝరిణీ హిమాద్రికుహరాద్యద్వత్సుధాంశోః ప్రభా
నిర్గచ్ఛత్యతివేగతః కమపి చ త్యక్త్వా ప్రయత్నం ముహుః |
తద్వద్యత్పదభక్తవక్త్రకుహరాద్వాణీ జవాన్నిఃసరేత్
తం వందే మునిబృందవంద్యచరణం శ్రీదక్షిణాస్యం ముదా || ౬ ||
అప్పిత్తార్కశశాంకనేత్రమగజాసంలింగితాంగం కృపా-
-వారాశిం విధివిష్ణుముఖ్యదివిజైః సంసేవితాంఘ్రిం ముదా |
నందీశప్రముఖైర్గణైః పరివృతం నాగాస్యషడ్వక్త్రయు-
-క్పార్శ్వం నీలగళం నమామి వటభూరుణ్మూలవాసం శివమ్ || ౭ ||
శీతాంశుప్రతిమానకాంతివపుషం పీతాంబురాశ్యాదిభి-
-ర్మౌనీంద్రైః పరిచింత్యమానమనిశం మోదాద్ధృదంభోరుహే |
శాంతానంగకటాక్షిభాసినిటిలం కాంతార్ధకాయం విభుం
వందే చిత్రచరిత్రమిందుముకుటం న్యగ్రోధమూలాశ్రయమ్ || ౮ ||
ఇతి శ్రీజగద్గురు శ్రీసచ్చిదానంద శివాభినవ నృసింహ భారతీ స్వామిభిః విరచితం శ్రీ దక్షిణామూర్త్యష్టకమ్ ||