అగణితగుణగణమప్రమేయమాద్యం
సకలజగత్స్థితిసంయమాది హేతుమ్ |
ఉపరతమనోయోగిహృన్మందిరం తం
సతతమహం దక్షిణామూర్తిమీడే || ౧ ||
నిరవధిసుఖమిష్టదాతారమీడ్యం
నతజనమనస్తాపభేదైకదక్షమ్ |
భవవిపినదవాగ్నినామధేయం
సతతమహం దక్షిణామూర్తిమీడే || ౨ ||
త్రిభువనగురుమాగమైకప్రమాణం
త్రిజగత్కారణసూత్రయోగమాయమ్ |
రవిశతభాస్వరమీహితప్రదానం
సతతమహం దక్షిణామూర్తిమీడే || ౩ ||
అవిరతభవభావనాఽతిదూరం
పదపద్మద్వయభావినామదూరమ్ |
భవజలధిసుతారణాంఘ్రిపోతం
సతతమహం దక్షిణామూర్తిమీడే || ౪ ||
కృతనిలయమనిశం వటాకమూలే
నిగమశిఖావ్రాతబోధితైకరూపమ్ |
ధృతముద్రాంగుళిగమ్యచారుబోధం
సతతమహం దక్షిణామూర్తిమీడే || ౫ ||
ద్రుహిణసుతపూజితాంఘ్రిపద్మం
పదపద్మానతమోక్షదానదక్షమ్ |
కృతగురుకులవాసయోగిమిత్రం
సతతమహం దక్షిణామూర్తిమీడే || ౬ ||
యతివరహృదయే సదా విభాంతం
రతిపతిశతకోటిసుందరాంగమాద్యమ్ |
పరహితనిరతాత్మనాం సుసేవ్యం
సతతమహం దక్షిణామూర్తిమీడే || ౭ ||
స్మితధవళవికాసితాననాబ్జం
శ్రుతిసులభం వృషభాధిరూఢగాత్రమ్ |
సితజలజసుశోభిదేహకాంతిం
సతతమహం దక్షిణామూర్తిమీడే || ౮ ||
వృషభకృతమిదమిష్టసిద్ధిదం
గురువరదేవసన్నిధౌ పఠేద్యః |
సకలదురితదుఃఖవర్గహానిం
వ్రజతి చిరం జ్ఞానవాన్ శంభులోకమ్ || ౯ ||
ఇతి శ్రీవృషభదేవ కృత శ్రీ దక్షిణామూర్త్యష్టకమ్ ||