పార్వత్యువాచ |
నమస్తేఽస్తు త్రయీనాథ పరమానందకారక |
కవచం దక్షిణామూర్తేః కృపయా వద మే ప్రభో || ౧ ||
ఈశ్వర ఉవాచ |
వక్ష్యేఽహం దేవదేవేశి దక్షిణామూర్తిరవ్యయమ్ |
కవచం సర్వపాపఘ్నం వేదాంతజ్ఞానగోచరమ్ || ౨ ||
అణిమాది మహాసిద్ధివిధానచతురం శుభమ్ |
వేదశాస్త్రపురాణాని కవితా తర్క ఏవ చ || ౩ ||
బహుధా దేవి జాయంతే కవచస్య ప్రభావతః |
ఋషిర్బ్రహ్మా సముద్దిష్టశ్ఛందోఽనుష్టుబుదాహృతమ్ || ౪ ||
దేవతా దక్షిణామూర్తిః పరమాత్మా సదాశివః |
బీజం వేదాదికం చైవ స్వాహా శక్తిరుదాహృతా |
సర్వజ్ఞత్వేఽపి దేవేశి వినియోగం ప్రచక్షతే || ౫ ||
ధ్యానమ్ –
అద్వంద్వనేత్రమమలేందుకళావతంసం
హంసావలంబిత సమాన జటాకలాపమ్ |
ఆనీలకంఠముపకంఠమునిప్రవీరాన్
అధ్యాపయంతమవలోకయ లోకనాథమ్ ||
కవచమ్ –
ఓం | శిరో మే దక్షిణామూర్తిరవ్యాత్ ఫాలం మహేశ్వరః |
దృశౌ పాతు మహాదేవః శ్రవణే చంద్రశేఖరః || ౧ ||
కపోలౌ పాతు మే రుద్రో నాసాం పాతు జగద్గురుః |
ముఖం గౌరీపతిః పాతు రసనాం వేదరూపధృత్ || ౨ ||
దశనాం త్రిపురధ్వంసీ చోష్ఠం పన్నగభూషణః |
అధరం పాతు విశ్వాత్మా హనూ పాతు జగన్మయః || ౩ ||
చుబుకం దేవదేవస్తు పాతు కంఠం జటాధరః |
స్కంధౌ మే పాతు శుద్ధాత్మా కరౌ పాతు యమాంతకః || ౪ ||
కుచాగ్రం కరమధ్యం చ నఖరాన్ శంకరః స్వయమ్ |
హృన్మే పశుపతిః పాతు పార్శ్వే పరమపూరుషః || ౫ ||
మధ్యమం పాతు శర్వో మే నాభిం నారాయణప్రియః |
కటిం పాతు జగద్భర్తా సక్థినీ చ మృడః స్వయమ్ || ౬ ||
కృత్తివాసాః స్వయం గుహ్యామూరూ పాతు పినాకధృత్ |
జానునీ త్ర్యంబకః పాతు జంఘే పాతు సదాశివః || ౭ ||
స్మరారిః పాతు మే పాదౌ పాతు సర్వాంగమీశ్వరః |
ఇతీదం కవచం దేవి పరమానందదాయకమ్ || ౮ ||
జ్ఞానవాగర్థదం వీర్యమణిమాదివిభూతిదమ్ |
ఆయురారోగ్యమైశ్వర్యమపమృత్యుభయాపహమ్ || ౯ ||
ప్రాతః కాలే శుచిర్భూత్వా త్రివారం సర్వదా జపేత్ |
నిత్యం పూజాసమాయుక్తః సంవత్సరమతంద్రితః || ౧౦ ||
జపేత్ త్రిసంధ్యం యో విద్వాన్ వేదశాస్త్రార్థపారగః |
గద్యపద్యైస్తథా చాపి నాటకాః స్వయమేవ హి |
నిర్గచ్ఛంతి ముఖాంభోజాత్సత్యమేతన్న సంశయః || ౧౧ ||
ఇతి రుద్రయామలే ఉమామహేశ్వరసంవాదే శ్రీ దక్షిణామూర్తి కవచమ్ ||