తేజఃకించిత్కాంచనటంకీకపిశాభాన్
బిభ్రద్బభ్రూనుద్భటకాపర్దకలాపాన్ |
భస్మాలేపస్మేరలలాటం వటమూలే
దృష్టం దుష్టాపస్మృతిహారి స్మరహంతృ || ౧ ||
న్యగ్రోధాధో ధిక్కృతధారాధరధీర
గ్రీవాభోగం భోగికులాకల్పమనల్పమ్ |
ముగ్ధాకారం ముగ్ధనిశానాథవతంసం
ముగ్ధస్మేరం మోహవిరామం విమృశామః || ౨ ||
నాసాదత్తాలోకనయానావ్యసరోరు-
-ట్కింజల్కాళిపింగజటాజూటకవత్యా |
ప్రౌఢాపస్మారస్మయితాఘస్మరశక్త్యా
చిత్రీభూతం చిత్కళయా మామకమంతః || ౩ ||
విద్యారూపే వేదగిరామే కవిమృగ్యే
నద్యామౌళౌ నర్తనశీలాలకచూడే |
ఆలీనం మే మానసమాలీఢమనోభూ-
-గాఢాహంకారాంకురలాలాటకృశానౌ || ౪ ||
వైయాఘ్రత్వక్చిత్రపటీక్లుప్తకటీకా
టీకాకారజ్ఞానసముద్రానిగమోక్తేః |
ముక్తేర్మాతా మూలమపారస్య మహిమ్న-
-శ్చిద్వైదగ్ధ్రీ కాంచన చిత్తే మమ భాతి || ౫ ||
ఇందూత్తంసం కాళిమకంఠం శిఖినేత్రం
సిందూరోష్ఠం శుద్ధతనుం బద్ధఫణీంద్రమ్ |
భాదీశాభా భాసురహాసం భవమంతః
శార్దూలత్వగ్వాససమీశం వరివస్యే || ౬ ||
ముద్రా కాచిత్ జ్ఞానమయీ యం మునిశంస-
-న్మోహధ్వాంతోత్కర్తనవైకర్తనమూర్తేః |
ఆర్తిం భింద్యాదాశయలగ్నామనిశం నో
నైయగ్రోధీం మూలభువం చాధిశయానా || ౭ ||
నీహారాంభో హారసితైరావతగంగా
పాటీరాళీ భూతిసుధాసూతివలక్షమ్ |
సద్రుద్రాక్షస్రగ్ధరముద్రాక్షమనక్ష-
-స్పందం మందస్మేరమనాదిం గురుమంతః || ౮ ||
ఘోరాపస్మృత్యుత్కటపృష్ఠే వినివిష్టో
యస్యైకోంఘ్రిస్తత్పృథులోరు స్థితిరన్యః |
వస్తుధ్యానాదుద్ధృతనిష్పందశరీరం
శాంతం తేజస్తన్మహిమానం సముపాసే || ౯ ||
ఏతాం మాలాం నవమణిరూపామాదిగురో-
-ర్భక్త్యా నిత్యం పఠతి చ యో జాడ్యవిముక్తః |
అష్టాచత్వారింశతి సాహస్రసమత్వం
గత్వా తస్మిన్ విలయముపైత్యేవ స ధన్యః || ౧౦ ||
ఇతి శ్రీనవనాథసిద్ధకృత శ్రీ దక్షిణామూర్తి నవమణిమాలా స్తోత్రమ్ ||