గజేంద్రశార్దూల మృగేంద్రవాహనం
మునీంద్రసంసేవిత పాదపంకజమ్ |
దేవీద్వయేనావృత పార్శ్వయుగ్మం
శాస్తారమాద్యం సతతం నమామి || ౧ ||
హరిహరభవమేకం సచ్చిదానందరూపం
భవభయహరపాదం భావనాగమ్యమూర్తిమ్ |
సకలభువనహేతుం సత్యధర్మానుకూలం
శ్రితజనకులపాలం ధర్మశాస్తారమీడే || ౨ ||
హరిహరసుతమీశం వీరవర్యం సురేశం
కలియుగభవభీతిధ్వంసలీలావతారమ్ |
జయవిజయలక్ష్మీ సుసంసృతాజానుబాహుం
మలయగిరినివాసం ధర్మశాస్తారమీడే || ౩ ||
పరశివమయమీడ్యం భూతనాథం మునీంద్రం
కరధృతవికచాబ్జం బ్రహ్మపంచస్వరూపమ్ |
మణిమయసుకిరీటం మల్లికాపుష్పహారం
వరవితరణశీలం ధర్మశాస్తారమీడే || ౪ ||
హరిహరమయమాయ బింబమాదిత్యకోటి-
-త్విషమమలముఖేందుం సత్యసంధం వరేణ్యమ్ |
ఉపనిషదవిభావ్యం ఓమితిధ్యానగమ్యం
మునిజనహృదిచింత్యం ధర్మశాస్తారమీడే || ౫ ||
కనకమయ దుకూలం చందనార్ద్రావసిక్తం
సరసమృదులహాసం బ్రాహ్మణానందకారమ్ |
మధురసమయపాణిం మారజీవాతులీలం
సకలదురితనాశం ధర్మశాస్తారమీడే || ౬ ||
మునిజనగణసేవ్యం ముక్తిసామ్రాజ్యమూలం
విదితసకలతత్త్వజ్ఞానమంత్రోపదేశమ్ |
ఇహపరఫలహేతుం తారకం బ్రహ్మసంజ్ఞం
షడరిమలవినాశం ధర్మశాస్తారమీడే || ౭ ||
మధురసఫలముఖ్యైః పాయసైర్భక్ష్యజాలైః
దధిఘృతపరిపూర్ణైరన్నదానైః సంతుష్టమ్ |
నిజపదనమితానాం నిత్యవాత్సల్యభావం
హృదయకమలమధ్యే ధర్మశాస్తారమీడే || ౮ ||
భవగుణజనితానాం భోగమోక్షాయ నిత్యం
హరిహరభవదేవస్యాష్టకం సన్నిధౌ యః |
పఠతి సకలభోగాన్ ముక్తిసామ్రాజ్యభాగ్యే
భువిదివిసువస్తస్మై నిత్యతుష్టో దదాతి || ౯ ||
ఇతి శ్రీమహాశాస్తాష్టకం సంపూర్ణమ్ |