త్ర్యైలోక్యలక్ష్మీమదభృత్సురేశ్వరో
యదా ఘనైరంతకరైర్వవర్షహ |
తదాఽకరోద్యః స్వబలేన రక్షణం
తం గోపబాలం గిరిధారిణం భజే || ౧ ||
యః పాయయంతీమధిరుహ్య పూతనాం
స్తన్యం పపౌ ప్రాణపరాయణః శిశుః |
జఘాన వాతాయితదైత్యపుంగవం
తం గోపబాలం గిరిధారిణం భజే || ౨ ||
నందవ్రజం యః స్వరుచేందిరాలయం
చక్రే దిగీశాన్ దివి మోహవృద్ధయే |
గోగోపగోపీజనసర్వసౌఖ్యకృత్
తం గోపబాలం గిరిధారిణం భజే || ౩ ||
యం కామదోగ్ధ్రీ గగనాహృతైర్జలైః
స్వజ్ఞాతిరాజ్యే ముదితాభ్యషించత |
గోవిందనామోత్సవకృద్వ్రజౌకసాం
తం గోపబాలం గిరిధారిణం భజే || ౪ ||
యస్యాననాబ్జం వ్రజసుందరీజనా
దినక్షయే లోచనషట్పదైర్ముదా |
పిబంత్యధీరా విరహాతురా భృశం
తం గోపబాలం గిరిధారిణం భజే || ౫ ||
బృందావనే నిర్జరబృందవందితే
గాశ్చారయన్యః కలవేణునిఃస్వనః |
గోపాంగనాచిత్తవిమోహమన్మథ-
-స్తం గోపబాలం గిరిధారిణం భజే || ౬ ||
యః స్వాత్మలీలారసదిత్సయా సతా-
-మావిశ్యకారాఽగ్నికుమారవిగ్రహమ్ |
శ్రీవల్లభాధ్వానుసృతైకపాలక-
-స్తం గోపబాలం గిరిధారిణం భజే || ౭ ||
గోపేంద్రసూనోర్గిరిధారిణోఽష్టకం
పఠేదిదం యస్తదనన్యమానసః |
స ముచ్యతే దుఃఖమహార్ణవాద్భృశం
ప్రాప్నోతి దాస్యం గిరిధారిణో ధ్రువమ్ || ౮ ||
ప్రణమ్య సంప్రార్థయతే తవాగ్రత-
-స్త్వదంఘ్రిరేణుం రఘునాథనామకః |
శ్రీవిఠ్ఠలానుగ్రహలబ్ధసన్మతి-
-స్తత్పూరయైతస్య మనోరథార్ణవమ్ || ౯ ||
ఇతి శ్రీరఘునాథప్రభు కృత శ్రీ గిరిధార్యష్టకమ్ ||