వరదానకరాబ్జాయ వటమూలనివాసినే |
వదాన్యాయ వరేణ్యాయ వామదేవాయ మంగళమ్ || ౧ ||
వల్లీశవిఘ్నరాజాభ్యాం వందితాయ వరీయసే |
విశ్వార్తిహరణాయాఽస్తు విశ్వనాథాయ మంగళమ్ || ౨ ||
కళ్యాణవరదానాయ కరుణానిధయే కలౌ |
కమలాపతికాంతాయ కల్పరూపాయ మంగళమ్ || ౩ ||
సర్వారిష్టవినాశాయ సర్వాభీష్టప్రదాయినే |
సర్వమంగళరూపాయ సద్యోజాతాయ మంగళమ్ || ౪ ||
ఈతిభీతినివారాయ చేతిహాసాఽభివాదినే |
ఈషణాత్రయహారాయ చేశానోర్ధ్వాయ మంగళమ్ || ౫ ||
అతిసౌమ్యాఽతిరుద్రాయ అవిరుద్ధాయ శూలినే |
అమలాయ మహేశాయ అఘోరేశాయ మంగళమ్ || ౬ ||
దూర్వాసాదిప్రపూజ్యాయ దుష్టనిగ్రహకారిణే |
దూరీకృతాయ దుఃఖానాం ధూళిధారాయ మంగళమ్ || ౭ ||
హృదయాంబుజవాసాయ హరాయ పరమాత్మనే |
హరికేశాయ హృద్యాయ హంసరూపాయ మంగళమ్ || ౮ ||
కకుద్వాహాయ కల్పాయ కల్పితానేకభూతినే |
కమలాలయవాసాయ కరుణాక్షాయ మంగళమ్ || ౯ ||
నకారాయ నటేశాయ నందివిద్యావిధాయినే |
నదీచంద్రజటేశాయ నాదరూపాయ మంగళమ్ || ౧౦ ||
మకారాయ మహేశాయ మందహాసేనభాసినే |
మహనీయ మనోరమ్య మాననీయాయ మంగళమ్ || ౧౧ ||
శివాయ శక్తినాథాయ సచ్చిదానందరూపిణే |
సులభాయ సుశీలాయ శికారాద్యాయ మంగళమ్ || ౧౨ ||
వసిష్ఠాదిభిరర్చ్యాయ విశిష్టాచారవర్తినే |
విష్ణుబ్రహ్మాదివంద్యాయ వకారాఖ్యాయ మంగళమ్ || ౧౩ ||
యతిసేవ్యాయ యామ్యాయ యజ్ఞసాద్గుణ్యదాయినే |
యజ్ఞేశాయ యమాంతాయ యకారాంతాయ మంగళమ్ || ౧౪ ||
అరుణాచలపూజ్యాయ తరుణారుణభాసినే |
కలికల్మషనాశాయ మంగళం గురుమూర్తయే || ౧౫ ||
గురుమూర్తేరిదం స్తోత్రం సుప్రభాతాభిదం శుభమ్ |
పఠతాం శ్రీరవాప్నోతి భుక్తిముక్తిప్రదేరితా || ౧౬ ||
ఇతి శ్రీ గురుమూర్తి మంగళ స్తోత్రమ్ ||