గోవిందం గోకులానందం గోపాలం గోపివల్లభమ్ |
గోవర్ధనోద్ధరం ధీరం తం వందే గోమతీప్రియమ్ || ౧ ||
నారాయణం నిరాకారం నరవీరం నరోత్తమమ్ |
నృసింహం నాగనాథం చ తం వందే నరకాంతకమ్ || ౨ ||
పీతాంబరం పద్మనాభం పద్మాక్షం పురుషోత్తమమ్ |
పవిత్రం పరమానందం తం వందే పరమేశ్వరమ్ || ౩ ||
రాఘవం రామచంద్రం చ రావణారిం రమాపతిమ్ |
రాజీవలోచనం రామం తం వందే రఘునందనమ్ || ౪ ||
వామనం విశ్వరూపం చ వాసుదేవం చ విఠ్ఠలమ్ |
విశ్వేశ్వరం విభుం వ్యాసం తం వందే వేదవల్లభమ్ || ౫ ||
దామోదరం దివ్యసింహం దయాళుం దీననాయకమ్ |
దైత్యారిం దేవదేవేశం తం వందే దేవకీసుతమ్ || ౬ ||
మురారిం మాధవం మత్స్యం ముకుందం ముష్టిమర్దనమ్ |
ముంజకేశం మహాబాహుం తం వందే మధుసూదనమ్ || ౭ ||
కేశవం కమలాకాంతం కామేశం కౌస్తుభప్రియమ్ |
కౌమోదకీధరం కృష్ణం తం వందే కౌరవాంతకమ్ || ౮ ||
భూధరం భువనానందం భూతేశం భూతనాయకమ్ |
భావనైకం భుజంగేశం తం వందే భవనాశనమ్ || ౯ ||
జనార్దనం జగన్నాథం జగజ్జాడ్యవినాశకమ్ |
జామదగ్న్యం పరం జ్యోతిస్తం వందే జలశాయినమ్ || ౧౦ ||
చతుర్భుజం చిదానందం మల్లచాణూరమర్దనమ్ |
చరాచరగురుం దేవం తం వందే చక్రపాణినమ్ || ౧౧ ||
శ్రియఃకరం శ్రియోనాథం శ్రీధరం శ్రీవరప్రదమ్ |
శ్రీవత్సలధరం సౌమ్యం తం వందే శ్రీసురేశ్వరమ్ || ౧౨ ||
యోగీశ్వరం యజ్ఞపతిం యశోదానందదాయకమ్ |
యమునాజలకల్లోలం తం వందే యదునాయకమ్ || ౧౩ ||
సాలగ్రామశిలాశుద్ధం శంఖచక్రోపశోభితమ్ |
సురాసురైః సదా సేవ్యం తం వందే సాధువల్లభమ్ || ౧౪ ||
త్రివిక్రమం తపోమూర్తిం త్రివిధాఘౌఘనాశనమ్ |
త్రిస్థలం తీర్థరాజేంద్రం తం వందే తులసీప్రియమ్ || ౧౫ ||
అనంతమాదిపురుషమచ్యుతం చ వరప్రదమ్ |
ఆనందం చ సదానందం తం వందే చాఘనాశనమ్ || ౧౬ ||
లీలయా ధృతభూభారం లోకసత్త్వైకవందితమ్ |
లోకేశ్వరం చ శ్రీకాంతం తం వందే లక్ష్మణప్రియమ్ || ౧౭ ||
హరిం చ హరిణాక్షం చ హరినాథం హరప్రియమ్ |
హలాయుధసహాయం చ తం వందే హనుమత్ప్రియమ్ || ౧౮ ||
హరినామకృతా మాలా పవిత్రా పాపనాశినీ |
బలిరాజేంద్రేణ చోక్తా కంఠే ధార్యా ప్రయత్నతః ||
ఇతి బలిరాజేంద్రేణోక్తం శ్రీ హరి నామమాలా స్తోత్రమ్ |