(ఆది శంకరాచార్య విరచితం)

కంఠే యస్య లసత్కరాలగరలం గంగాజలం మస్తకే
వామాం‌గే గిరిరాజరాజతనయా జాయా భవానీ సతీ |
నందిస్కందగణాధిరాజసహితః శ్రీవిశ్వనాథప్రభుః
కాశీమందిరసంస్థితోఽఖిలగురుర్దేయాత్సదా మంగళమ్ || 1 ||

యో దేవైరసురైర్మునీంద్రతనయైర్గంధర్వయక్షోరగైః
నాగైర్భూతలవాసిభిర్ద్విజవరైః సంసేవితః సిద్ధయే |
యా గంగోత్తరవాహినీ పరిసరే తీర్థైరసంఖ్యైర్వృతా
సా కాశీ త్రిపురారిరాజనగరీ దేయాత్సదా మంగళమ్ || 2 ||

తీర్థానాం ప్రవరా మనోరథకరీ సంసారపారాపరా-
నందా నందిగణేశ్వరైరుపహితా దేవైరశేషైః స్తుతా |
యా శంభోర్మణికుండలైకకణికా విష్ణోస్తపో దీర్ఘికా
సేయం శ్రీమణికర్ణికా భగవతీ దేయాత్సదా మంగళమ్ || 3 ||

ఏషా ధర్మపతాకినీ తటరుహాసేవావసన్నాకినీ
పశ్యన్పాతకినీ భగీరథతపఃసాఫల్యదేవాకినీ |
ప్రేమారూఢపతాకినీ గిరిసుతా సా కేకరాస్వాకినీ
కాశ్యాముత్తరవాహినీ సురనదీ దేయాత్సదా మంగళమ్ || 4 ||

విఘ్నావాసనివాసకారణమహాగండస్థలాలంబితః
సిందూరారుణపుంజచంద్రకిరణప్రచ్చాదినాగచ్ఛవిః |
శ్రీవిశ్వేశ్వరవల్లభో గిరిజయా సానందకానందితః
స్మేరాస్యస్తవ ఢుండిరాజముదితో దేయాత్సదా మంగళమ్ || 5 ||

కేదారః కలశేశ్వరః పశుపతిర్ధర్మేశ్వరో మధ్యమో
జ్యేష్ఠేశో పశుపశ్చ కందుకశివో విఘ్నేశ్వరో జంబుకః |
చంద్రేశో హ్యమృతేశ్వరో భృగుశివః శ్రీవృద్ధకాలేశ్వరో
మధ్యేశో మణికర్ణికేశ్వరశివో దేయాత్సదా మంగళమ్ || 6 ||

గోకర్ణస్త్వథ భారభూతనుదనుః శ్రీచిత్రగుప్తేశ్వరో
యక్షేశస్తిలపర్ణసంగమశివో శైళేశ్వరః కశ్యపః |
నాగేశోఽగ్నిశివో నిధీశ్వరశివోఽగస్తీశ్వరస్తారక-
జ్ఞానేశోఽపి పితామహేశ్వరశివో దేయాత్సదా మంగళమ్ || 7 ||

బ్రహ్మాండం సకలం మనోషితరసై రత్నైః పయోభిః హరం
ఖేలైః పూరయతే కుటుంబనిలయాన్ శంభోర్విలాసప్రదా |
నానాదివ్యలతావిభూషితవపుః కాశీపురాధీశ్వరీ
శ్రీవిశ్వేశ్వరసుందరీ భగవతీ దేయాత్సదా మంగళమ్ || 8 ||

యా దేవీ మహిషాసురప్రమథనీ యా చండముండాపహా
యా శుంభాసురరక్తబీజదమనీ శక్రాదిభిః సంస్తుతా |
యా శూలాసిధనుఃశరాభయకరా దుర్గాదిసందక్షిణా-
మాశ్రిత్యాశ్రితవిఘ్నశంసమయతు దేయాత్సదా మంగళమ్ || 9 ||

ఆద్యా శ్రీర్వికటా తదస్తు విరజా శ్రీమంగళా పార్వతీ
విఖ్యాతా కమలా విశాలనయనా జ్యేష్ఠా విశిష్టాననా |
కామాక్షీ చ హరిప్రియా భగవతీ శ్రీఘంటఘంటాదికా
మౌర్యా షష్టిసహస్రమాత్రుసహితా దేయాత్సదా మంగళమ్ || 10 ||

ఆదౌ పంచనదం ప్రయాగమపరం కేదారకుండం కురు-
క్షేత్రం మానసకం సరోఽమృతజలం శావస్య తీర్థం పరమ్ |
మత్స్యోదర్యథ దండఖాండసలిలం మందాకినీ జంబుకం
ఘంటాకర్ణసముద్రకూపసహితో దేయాత్సదా మంగళమ్ || 11 ||

రేవాకుండజలం సరస్వతిజలం దుర్వాసకుండం తతో
లక్ష్మీతీర్థలవాంకుశస్య సలిలం కందర్పకుండం తదా |
దుర్గాకుండమసీజలం హనుమతః కుండప్రతాపోర్జితః
ప్రజ్ఞానప్రముఖాని వః ప్రతిదినం దేయాత్సదా మంగళమ్ || 12 ||

ఆద్యః కూపవరస్తు కాలదమనః శ్రీవృద్ధకూపోఽపరో
విఖ్యాతస్తు పరాశరస్తు విదితః కూపః సరో మానసః |
జైగీషవ్యమునేః శశాంకనృపతేః కూపస్తు ధర్మోద్భవః
ఖ్యాతః సప్తసముద్రకూపసహితో దేయాత్సదా మంగళమ్ || 13 ||

లక్ష్యీనాయకబిందుమాధవహరిర్లక్ష్మీనృసింహస్తతో
గోవిందస్త్వథ గోపికాప్రియతమః శ్రీనారదః కేశవః |
గంగాకేశవవామనాఖ్యతదను శ్వేతో హరిః కేశవః
ప్రహ్లాదాదిసమస్తకేశవగణో దేయాత్సదా మంగళమ్ || 14 ||

లోలార్కో విమలార్కమాయుఖరవిః సంవర్తసంజ్ఞో రవిః
విఖ్యాతో ద్రుపదుఃఖఖోల్కమరుణః ప్రోక్తోత్తరార్కో రవిః |
గంగార్కస్త్వథ వృద్ధవృద్ధివిబుధా కాశీపురీసంస్థితాః
సూర్యా ద్వాదశసంజ్ఞకాః ప్రతిదినం దేయాత్సదా మంగళమ్ || 15 ||

ఆద్యో ఢుండివినాయకో గణపతిశ్చింతామణిః సిద్ధిదః
సేనావిఘ్నపతిస్తు వక్త్రవదనః శ్రీపాశపాణిః ప్రభుః |
ఆశాపక్షవినాయకాప్రషకరో మోదాదికః షడ్గుణో
లోలార్కాదివినాయకాః ప్రతిదినం దేయాత్సదా మంగళమ్ || 16 ||

హేరంబో నలకూబరో గణపతిః శ్రీభీమచండీగణో
విఖ్యాతో మణికర్ణికాగణపతిః శ్రీసిద్ధిదో విఘ్నపః |
ముండశ్చండముఖశ్చ కష్టహరణః శ్రీదండహస్తో గణః
శ్రీదుర్గాఖ్యగణాధిపః ప్రతిదినం దేయాత్సదా మంగళమ్ || 17 ||

ఆద్యో భైరవభీషణస్తదపరః శ్రీకాలరాజః క్రమా-
చ్ఛ్రీసంహారకభైరవస్త్వథ రురుశ్చోన్మత్తకో భైరవః |
క్రోధశ్చండకపాలభైరవవరః శ్రీభూతనాథాదయో
హ్యష్టౌ భైరవమూర్తయః ప్రతిదినం దేయాత్సదా మంగళమ్ || 18 ||

ఆధాతోఽంబికయా సహ త్రినయనః సార్థం గణైర్నందితాం
కాశీమాశు విశన్ హరః ప్రథమతో వార్షధ్వజేఽవస్థితః |
ఆయాతా దశ ధెనవః సుకపిలా దివ్యైః పయోభిర్హరం
ఖ్యాతం తద్వృషభధ్వజేన కపిలం దేయాత్సదా మంగళమ్ || 19 ||

ఆనందాఖ్యవనం హి చంపకవనం శ్రీనైమిషం ఖాండవం
పుణ్యం చైత్రరథం త్వశాకవిపినం రంభావనం పావనమ్ |
దుర్గారణ్యమథోఽపి కైరవవనం వృందావనం పావనమ్
విఖ్యాతాని వనాని వః ప్రతిదినం దేయాత్సదా మంగళమ్ || 20 ||

అలికులదలనీలః కాలదంష్ట్రాకరాలః
సజలజలదనీలో వ్యాలయజ్ఞోపవీతః |
అభయవరదహస్తో డామరోద్దామనాదః
సకలదురితభక్షో మంగళం వో దదాతు || 21 ||

అర్ధాంగే వికటా గిరీంద్రతనయా గౌరీ సతీ సుందరీ
సర్వాంగే విలసద్విభూతిధవలో కాలో విశాలేక్షణః |
వీరిశః సహనందిభృంగిసహితః శ్రీవిశ్వనాథః ప్రభుః
కాశీమందిరసంస్థితోఽఖిలగురుర్దేయాత్సదా మంగళమ్ || 22 ||

యః ప్రాతః ప్రయతః ప్రసన్నమనసా ప్రేమప్రమోదాకులః
ఖ్యాతం తత్ర విశిష్టపాదభువనేశేంద్రాదిభిర్యత్స్తుతమ్ |
ప్రాతః ప్రాంగ్ముఖమాసనోత్తమగతో బ్రూయాచ్ఛృణోత్యాదరాత్
కాశీవాసముఖాన్యవాప్య సతతం ప్రీతే శివే ధూర్జటి || 23 ||

ఇతి శ్రీమచ్చంకరాచార్యవిరచితం కాశీవిశ్వనాథస్తోత్రమ్ సంపూర్ణమ్||