అగస్త్య ఉవాచ |
వాజివక్త్ర మహాబుద్ధే పంచవింశతినామభిః |
లలితాపరమేశాన్యా దేహి కర్ణరసాయనమ్ || ౧ ||
హయగ్రీవ ఉవాచ |
సింహాసనేశీ లలితా మహారాజ్ఞీ పరాంకుశా |
చాపినీ త్రిపురా చైవ మహాత్రిపురసుందరీ || ౨ ||
సుందరీ చక్రనాథా చ సామ్రాజీ చక్రిణీ తథా |
చక్రేశ్వరీ మహాదేవీ కామేశీ పరమేశ్వరీ || ౩ ||
కామరాజప్రియా కామకోటికా చక్రవర్తినీ |
మహావిద్యా శివానంగవల్లభా సర్వపాటలా || ౪ ||
కులనాథాఽఽమ్నాయనాథా సర్వామ్నాయనివాసినీ |
శృంగారనాయికా చేతి పంచవింశతినామభిః || ౫ ||
స్తువంతి యే మహాభాగాం లలితాం పరమేశ్వరీమ్ |
తే ప్రాప్నువంతి సౌభాగ్యమష్టౌసిద్ధీర్మహద్యశః || ౬ ||
ఇతి శ్రీబ్రహ్మాండపురాణే లలితోపాఖ్యానే అష్టాదశోఽధ్యాయే శ్రీలలితా పంచవింశతినామ స్తోత్రమ్ |