దేవర్షయ ఊచుః |
నమస్తే శిఖివాహాయ మయూరధ్వజధారిణే |
మయూరేశ్వరనామ్నే వై గణేశాయ నమో నమః || ౧ ||
అనాథానాం ప్రణాథాయ గతాహంకారిణాం పతే |
మాయాప్రచాలకాయైవ విఘ్నేశాయ నమో నమః || ౨ ||
సర్వానందప్రదాత్రే తే సదా స్వానందవాసినే |
స్వస్వధర్మరతానాం చ పాలకాయ నమో నమః || ౩ ||
అనాదయే పరేశాయ దైత్యదానవమర్దినే |
విధర్మస్థస్వభావానాం హర్త్రే వికట తే నమః || ౪ ||
శివపుత్రాయ సర్వేషాం మాత్రే పిత్రే నమో నమః |
పార్వతీనందనాయైవ స్కందాగ్రజ నమో నమః || ౫ ||
నానావతారరూపైస్తు విశ్వసంస్థాకరాయ తే |
కాశ్యపాయ నమస్తుభ్యం శేషపుత్రాయ తే నమః || ౬ ||
సింధుహంత్రే చ హేరంబాయ పరశుధరాయ తే |
దేవదేవేశ పాలాయ బ్రహ్మణాం పతయే నమః || ౭ ||
యోగేశాయ సుశాంతిభ్యః శాంతిదాత్రే కృపాళవే |
అనంతాననబాహో తేఽనంతోదర నమో నమః || ౮ ||
అనంతవిభవాయైవ చిత్తవృత్తిప్రచాలక |
సర్వహృత్స్థాయ సర్వేషాం పూజ్యాయ తే నమో నమః || ౯ ||
సర్వాదిపూజ్యరూపాయ జ్యేష్ఠరాజాయ తే నమః |
గణానాం పతయే చైవ సిద్ధిబుద్ధివరాయ చ || ౧౦ ||
కిం స్తుమస్త్వాం మయూరేశ యత్ర వేదాదయః ప్రభో |
యోగినః శాంతిమాపన్నా అతో నమామహే వయమ్ || ౧౧ ||
తేన తుష్టో భవ స్వామిన్ దయాఘన ప్రవర్తక |
త్వదీయాంగసముద్భూతాన్ రక్ష నో నిత్యదా ప్రభో || ౧౨ ||
ఏవం స్తుత్వా ప్రణేముస్తం తతో దేవోఽబ్రవీన్ స తాన్ |
వరాన్ వృణుత దేవేశా మునిభిశ్చ సమన్వితాః || ౧౩ ||
భవత్కృతమిదం స్తోత్రం సర్వసిద్ధిప్రదాయకమ్ |
భవిష్యతి మహాభాగా మమ ప్రీతివివర్ధనమ్ || ౧౪ ||
యః పఠేచ్ఛృణుయాద్వాపి శ్రావయేత్స లభత్ పరామ్ |
భుక్తిం ముక్తిం మదీయాం తు నరో భక్తిం న సంశయః || ౧౫ ||
ఇతి శ్రీమన్ముద్గలే మహాపురాణే షష్ఠే ఖండే శ్రీ మయూరేశ స్తుతిః |