కోట్యర్కభం కోటిసుచంద్రశాంతం
విశ్వాశ్రయం దేవగణార్చితాంఘ్రిమ్ |
భక్తప్రియం త్వాత్రిసుతం వరేణ్యం
వందే నృసింహేశ్వర పాహి మాం త్వమ్ || ౧ ||
మాయాతమోఽర్కం విగుణం గుణాఢ్యం
శ్రీవల్లభం స్వీకృతభిక్షువేషమ్ |
సద్భక్తసేవ్యం వరదం వరిష్ఠం
వందే నృసింహేశ్వర పాహి మాం త్వమ్ || ౨ ||
కామాదిషణ్మత్తగజాంకుశం త్వా-
-మానందకందం పరతత్త్వరూపమ్ |
సద్ధర్మగుప్త్యై విధృతావతారం
వందే నృసింహేశ్వర పాహి మాం త్వమ్ || ౩ ||
సూర్యేందుగుం సజ్జనకామధేనుం
మృషోద్యపంచాత్మకవిశ్వమస్మాత్ |
ఉదేతి యస్మిన్రమతేఽస్తమేతి
వందే నృసింహేశ్వర పాహి మాం త్వమ్ || ౪ ||
రక్తాబ్జపత్రాయతకాంతనేత్రం
సద్దండకుండీపరిహాపితాఘమ్ |
శ్రితస్మితజ్యోత్స్నముఖేందుశోభం
వందే నృసింహేశ్వర పాహి మాం త్వమ్ || ౫ ||
నిత్యం త్రయీమృగ్యపదాబ్జధూళిం
నినాదసద్బిందుకళాస్వరూపమ్ |
త్రితాపతప్తాశ్రితకల్పవృక్షం
వందే నృసింహేశ్వర పాహి మాం త్వమ్ || ౬ ||
దైన్యాదిభీకష్టదవాగ్నిమీడ్యం
యోగాష్టకజ్ఞానసమర్పణోత్కమ్ |
కృష్ణానదీపంచసరిద్యుతిస్థం
వందే నృసింహేశ్వర పాహి మాం త్వమ్ || ౭ ||
అనాదిమధ్యాంతమనంతశక్తి-
-మతర్క్యభావం పరమాత్మసంజ్ఞమ్ |
వ్యతీతవాగ్దృక్పథమద్వితీయం
వందే నృసింహేశ్వర పాహి మాం త్వమ్ || ౮ ||
స్తోత్రే క్వ తే మేఽస్త్యురుగాయ శక్తి-
-శ్చతుర్ముఖో వై విముఖోఽత్ర జాతః |
స్తువన్ ద్విజిహ్వోభవదీరయన్ త్వాం
వందే నృసింహేశ్వర పాహి మాం త్వమ్ || ౯ ||
ఇతి శ్రీవాసుదేవానందసరస్వతీవిరచితం శ్రీ నృసింహసరస్వతీ స్తోత్రమ్ |