రాహుర్దానవమంత్రీ చ సింహికాచిత్తనందనః |
అర్ధకాయః సదా క్రోధీ చంద్రాదిత్యవిమర్దనః || ౧ ||
రౌద్రో రుద్రప్రియో దైత్యః స్వర్భానుర్భానుభీతిదః |
గ్రహరాజః సుధాపాయీ రాకాతిథ్యభిలాషకః || ౨ ||
కాలదృష్టిః కాలరూపః శ్రీకంఠహృదయాశ్రయః |
విధుంతుదః సైంహికేయో ఘోరరూపో మహాబలః || ౩ ||
గ్రహపీడాకరో దంష్ట్రీ రక్తనేత్రో మహోదరః |
పంచవింశతినామాని స్మృత్వా రాహుం సదా నరః || ౪ ||
యః పఠేన్మహతీ పీడా తస్య నశ్యతి కేవలమ్ |
ఆరోగ్యం పుత్రమతులాం శ్రియం ధాన్యం పశూంస్తథా || ౫ ||
దదాతి రాహుస్తస్మై తు యః పఠేత్ స్తోత్రముత్తమమ్ |
సతతం పఠతే యస్తు జీవేద్వర్షశతం నరః || ౬ ||
ఇతి శ్రీస్కందపురాణే శ్రీ రాహు పంచవింశతినామ స్తోత్రమ్ ||