శ్రీ మహాదేవ ఉవాచ |
తతో రామః స్వయం ప్రాహ హనూమంతముపస్థితమ్ |
శృణు తత్త్వం ప్రవక్ష్యామి హ్యాత్మానాత్మపరాత్మనామ్ || ౧ ||
ఆకాశస్య యథా భేదస్త్రివిధో దృశ్యతే మహాన్ |
జలాశయే మహాకాశస్తదవచ్ఛిన్న ఏవ హి |
ప్రతిబింబాఖ్యమపరం దృశ్యతే త్రివిధం నభః || ౨ ||
బుద్ధ్యవచ్ఛిన్నచైతన్యమేకం పూర్ణమథాపరమ్ |
ఆభాసస్త్వపరం బింబభూతమేవం త్రిధా చితిః || ౩ ||
సాభాసబుద్ధేః కర్తృత్వమవిచ్ఛిన్నేఽవికారిణి |
సాక్షిణ్యారోప్యతే భ్రాంత్యా జీవత్వం చ తథాఽబుధైః || ౪ ||
ఆభాసస్తు మృషా బుద్ధిరవిద్యాకార్యముచ్యతే |
అవిచ్ఛిన్నం తు తద్బ్రహ్మ విచ్ఛేదస్తు వికల్పతః || ౫ ||
అవిచ్ఛిన్నస్య పూర్ణేన ఏకత్వం ప్రతిపద్యతే |
తత్త్వమస్యాదివాక్యైశ్చ సాభాసస్యాహమస్తథా || ౬ ||
ఐక్యజ్ఞానం యదోత్పన్నం మహావాక్యేన చాత్మనోః |
తదాఽవిద్యా స్వకార్యైశ్చ నశ్యత్యేవ న సంశయః || ౭ ||
ఏతద్విజ్ఞాయ మద్భక్తో మద్భావాయోపపద్యతే |
మద్భక్తివిముఖానాం హి శాస్త్రగర్తేషు ముహ్యతామ్ |
న జ్ఞానం న చ మోక్షః స్యాత్తేషాం జన్మశతైరపి || ౮ ||
ఇదం రహస్యం హృదయం మమాత్మనో
మయైవ సాక్షాత్కథితం తవానఘ |
మద్భక్తిహీనాయ శఠాయ న త్వయా
దాతవ్యమైంద్రాదపి రాజ్యతోఽధికమ్ || ౯ ||
ఇతి శ్రీమదధ్యాత్మరామాయణే బాలకాండే ప్రథమసర్గే శ్రీ రామ హృదయమ్ ||