సకలమంగళవృద్ధివిధాయిని
సకలసద్గుణసంతతిదాయిని |
సకలమంజులసౌఖ్యవికాశిని
హరతు మే దురితాని సరస్వతి || ౧ ||
అమరదానవమానవసేవితా
జగతి జాడ్యహరా శ్రుతదేవతా |
విశదపక్షవిహంగవిహారిణి
హరతు మే దురితాని సరస్వతి || ౨ ||
ప్రవరపండితపురుషపూజితా
ప్రవరకాంతివిభూషణరాజితా |
ప్రవరదేహవిభాభరమండితా
హరతు మే దురితాని సరస్వతి || ౩ ||
సకలశీతమరీచిసమాననా
విహితసేవకబుద్ధివికాశనా |
ధృతకమండలుపుస్తకమాలికా
హరతు మే దురితాని సరస్వతీ || ౪ ||
సకలమానససంశయహారిణి
భవభవోర్జితపాపనివారిణి |
సకలసద్గుణసంతతిధారిణి
హరతు మే దురితాని సరస్వతి || ౫ ||
ప్రబలవైరిసమూహవిమర్దిని
నృపసభాదిషుమానవివర్ధిని |
నతజనోదతసంకటభేదిని
హరతు మే దురితాని సరస్వతి || ౬ ||
సకలసద్గుణభూషితవిగ్రహా
నిజతనుద్యుతితర్జితవిగ్రహా |
విశదవస్త్రధరావిశదద్యుతి
హరతు మే దురితాని సరస్వతి || ౭ ||
భవదవానలశాంతితనూనపా-
-ద్ధితకరైంకృతిమంత్రకృతకృపా |
భవికచిత్తవిశుద్ధవిధాయిని
హరతు మే దురితాని సరస్వతి || ౮ ||
తనుభృతాం జడతామపహృత్య యా
విబుధతాం దదతే ముదితాఽర్చయా |
మతిమతాం జననీతి మతాఽత్రసా
హరతు మే దురితాని సరస్వతి || ౯ ||
సకలశాస్త్రపయోనిధినౌఃపరా
విశదకీర్తిధరాఽంగితమోహరా |
జినవరాననపద్మనివాసిని
హరతు మే దురితాని సరస్వతి || ౧౦ ||
ఇత్థం శ్రీశ్రుతదేవతాభగవతీ విద్వజ్జనానాం ప్రసూః
సమ్యగ్జ్ఞానవరప్రదా ఘనతమోనిర్నాశినీ దేహినామ్ |
శ్రేయః శ్రీవరదాయినీ సువిధినా సంపూజితా సంస్తుతా
దుష్కర్మాణ్యపహృత్య మే విదధతాం సమ్యక్ శ్రుతం సర్వదా || ౧౧ ||
ఇతి చిరంతనాచార్య విరచితం శ్రీ సరస్వతీ సరసశాంతి సుధారస స్తోత్రమ్ ||