కరవాణి వాణి కిం వా
జగతి ప్రచయాయ ధర్మమార్గస్య |
కథయాశు తత్కరోమ్యహ-
-మహర్నిశం తత్ర మా కృథా విశయమ్ || ౧ ||

గణనాం విధాయ మత్కృత-
-పాపానాం కిం ధృతాక్షమాలికయా |
తాంతాద్యాప్యసమాప్తే-
-ర్నిశ్చలతాం పాణిపంకజే ధత్సే || ౨ ||

వివిధాశయా మదీయం
నికటం దూరాజ్జనాః సమాయాంతి |
తేషాం తస్యాః కథమివ
పూరణమహమంబ సత్వరం కుర్యామ్ || ౩ ||

గతిజితమరాలగర్వాం
మతిదానధురంధరాం ప్రణమ్రేభ్యః |
యతినాథసేవితపదా-
-మతిభక్త్యా నౌమి శారదాం సదయామ్ || ౪ ||

జగదంబాం నగతనుజా-
-ధవసహజాం జాతరూపతనువల్లీమ్ |
నీలేందీవరనయనాం
బాలేందుకచాం నమామి విధిజాయామ్ || ౫ ||

భారో భారతి న స్యా-
-ద్వసుధాయాస్తద్వదంబ కురు శీఘ్రమ్ |
నాస్తికతానాస్తికతా-
-కరణాత్కారుణ్యదుగ్ధవారాశే || ౬ ||

నికటే వసంతమనిశం
పక్షిణమపి పాలయామి కరతోఽహమ్ |
కిము భక్తియుక్తలోకా-
-నితి బోధార్థం కరే శుకం ధత్సే || ౭ ||

శృంగాద్రిస్థితజనతా-
-మనేకరోగైరుపద్రుతాం వాణి |
వినివార్య సకలరోగాన్
పాలయ కరుణార్ద్రదృష్టిపాతేన || ౮ ||

మద్విరహాదతిభీతాన్
మదేకశరణానతీవ దుఃఖార్తాన్ |
మయి యది కరుణా తవ భో
పాలయ శృంగాద్రివాసినో లోకాన్ || ౯ ||

సదనమహేతుకృపాయా
రదనవినిర్ధూతకుందగర్వాలిమ్ |
మదనరిపుసహోత్థాం
సరసిజభవభామినీం హృదా కలయే || ౧౦ ||

ఇతి శ్రీసచ్చిదానందశివాభినవనృసింహభారతీస్వామిభిః విరచితం శ్రీ శారదా దశకమ్ ||