సౌందర్యమాధుర్యసుధాసముద్ర-
-వినిద్రపద్మాసనసన్నివిష్టామ్ |
చంచద్విపంచీకలనాదముగ్ధాం
శుద్ధాం దధేఽంతర్విసరత్సుగంధామ్ || ౧ ||
శ్రుతిఃస్మృతిస్తత్పదపద్మగంధి-
-ప్రభామయం వాఙ్మయమస్తపారమ్ |
యత్కోణకోణాభినివిష్టమిష్టం
తామంబికాం సర్వసితాం శ్రితాః స్మః || ౨ ||
న కాందిశీకం రవితోఽతివేలం
తం కౌశికం సంస్పృహయే నిశాతమ్ |
సావిత్రసారస్వతధామపశ్యం
శస్యం తపోబ్రాహ్మణమాద్రియే తమ్ || ౩ ||
శ్రీశారదాం ప్రార్థితసిద్ధవిద్యాం
శ్రీశారదాంభోజసగోత్రనేత్రామ్ |
శ్రీశారదాంభోజనివీజ్యమానాం
శ్రీశారదాంకానుజనిం భజామి || ౪ ||
చక్రాంగరాజాంచితపాదపద్మాం
పద్మాలయాఽభ్యర్థితసుస్మితశ్రీః |
స్మితశ్రియా వర్షితసర్వకామా
వామా విధేః పూరయతాం ప్రియం నః || ౫ ||
బాహో రమాయాః కిల కౌశికోఽసౌ
హంసో భవత్యాః ప్రథితో వివిక్తః |
జగద్విధాతుర్మహిషి త్వమస్మాన్
విధేహి సభ్యాన్నహి మాతరిభ్యాన్ || ౬ ||
స్వచ్ఛవ్రతః స్వచ్ఛచరిత్రచుంచుః
స్వచ్ఛాంతరః స్వచ్ఛసమస్తవృత్తిః |
స్వచ్ఛం భవత్యాః ప్రపదం ప్రపన్నః
స్వచ్ఛే త్వయి బ్రహ్మణి జాతు యాతు || ౭ ||
రవీందువహ్నిద్యుతికారిదీప్రం
సింహాసనం సంతతవాద్యగానమ్ |
విదీపయన్మాతృకధామ యామః
కారుణ్యపూర్ణామృతవారివాహమ్ || ౮ ||
శుభ్రాం శుభ్రసరోజముగ్ధవదనాం శుభ్రాంబరాలంకృతాం
శుభ్రాంగీం శుభశుభ్రహాస్యవిశదాం శుభ్రస్రగాశోభినీమ్ |
శుభ్రోద్దామలలామధామమహిమాం శుభ్రాంతరంగాగతాం
శుభ్రాభాం భయహారిభావభరితాం శ్రీభారతీం భావయే || ౯ ||
ముక్తాలంకృతకుంతలాంతసరణిం రత్నాలిహారావళిం
కాంచీకాంతీవలగ్నలగ్నవలయాం వజ్రాంగుళీయాంగుళిమ్ |
లీలాచంచలలోచనాంచలచలల్లోకేశలోలాలకాం
కల్యామాకలయేఽతివేలమతులాం విత్కల్పవల్లీకలామ్ || ౧౦ ||
ప్రయతో ధారయేద్యస్తు సారస్వతమియం స్తవమ్ |
సారస్వతం తస్య మహః ప్రత్యక్షమచిరాద్భవేత్ || ౧౧ ||
వాగ్బీజసంపుటం స్తోత్రం జగన్మాతుః ప్రసాదజమ్ |
శివాలయే జపన్ మర్త్యః ప్రాప్నుయాద్బుద్ధివైభవమ్ || ౧౨ ||
సూర్యగ్రహే ప్రజపితః స్తవః సిద్ధికరః పరః |
వారాణస్యాం పుణ్యతీర్థే సద్యో వాంఛితదాయకః || ౧౩ ||
పాదాంభోజే సరస్వత్యాః శంకరాచార్యభిక్షుణా |
కాశీపీఠాధిపతినా గుంఫితా స్రక్ సమర్పితా || ౧౪ ||
ఇతి కాశీపీఠాధీశ్వరజగద్గురు శంకరాచార్య స్వామి శ్రీమహేశ్వరానంద సరస్వతీ విరచితం శ్రీ సిద్ధసరస్వతీ స్తోత్రమ్ ||