లోమహర్షణ ఉవాచ |
దేవదేవో జగద్యోనిరయోనిర్జగదాదిజః |
అనాదిరాదిర్విశ్వస్య వరేణ్యో వరదో హరిః || ౧ ||
పరావరాణాం పరమః పరాపరసతాం గతిః |
ప్రభుః ప్రమాణం మానానాం సప్తలోకగురోర్గురుః |
స్థితిం కర్తుం జగన్నాథం సోఽచింత్యో గర్భతాం గతః || ౨ ||
ప్రభుః ప్రభూణాం పరమః పరాణా-
-మనాదిమధ్యో భగవాననంతః |
త్రైలోక్యమంశేన సనాథమేకః
కర్తుం మహాత్మాఽదితిజోఽవతీర్ణః || ౩ ||
న యస్య రుద్రా న చ పద్మయోని-
-ర్నేంద్రో న సూర్యేందుమరీచిమిశ్రాః |
జానంతి దైత్యాధిప యత్స్వరూపం
స వాసుదేవః కలయావతీర్ణః || ౪ ||
యమక్షరం వేదవిదో వదంతి
విశంతి యం జ్ఞానవిధూతపాపాః |
యస్మిన్ ప్రవిష్టా న పునర్భవంతి
తం వాసుదేవం ప్రణమామి దేవమ్ || ౫ ||
భూతాన్యశేషాణి యతో భవంతి
యథోర్మయస్తోయనిధేరజస్రమ్ |
లయం చ యస్మిన్ ప్రలయే ప్రయాంతి
తం వాసుదేవం ప్రణతోఽస్మ్యచింత్యమ్ || ౬ ||
న యస్య రూపం న బలం ప్రభావో
న చ ప్రతాపః పరమస్య పుంసః |
విజ్ఞాయతే సర్వపితామహాద్యై-
-స్తం వాసుదేవం ప్రణమామి నిత్యమ్ || ౭ ||
రూపస్య చక్షుర్గ్రహణే త్వగేషా
స్పర్శగ్రహిత్రీ రసనా రసస్య |
ఘ్రాణం చ గంధగ్రహణే నియుక్తం
న ఘ్రాణచక్షుః శ్రవణాది తస్య || ౮ ||
స్వయంప్రకాశః పరమార్థతో యః
సర్వేశ్వరో వేదితవ్యః స యుక్త్యా |
శక్యం తమీడ్యమనఘం చ దేవం
గ్రాహ్యం నతోఽహం హరిమీశితారమ్ || ౯ ||
యేనైకదంష్ట్రేణ సముద్ధృతేయం
ధరా చలా ధారయతీహ సర్వమ్ |
శేతే గ్రసిత్వా సకలం జగద్య-
-స్తమీడ్యమీశం ప్రణతోఽస్మి విష్ణుమ్ || ౧౦ ||
అంశావతీర్ణేన చ యేన గర్భే
హృతాని తేజాంసి మహాసురాణామ్ |
నమామి తం దేవమనంతమీశ-
-మశేషసంసారతరోః కుఠారమ్ || ౧౧ ||
దేవో జగద్యోనిరయం మహాత్మా
స షోడశాంశేన మహాఽసురేంద్రాః |
సురేంద్రమాతుర్జఠరం ప్రవిష్టో
హృతాని వస్తేన బలం వపూంషి || ౧౨ ||
ఇతి శ్రీవామనపురాణే నవవింశతితమోఽధ్యాయే శ్రీ వామన స్తోత్రమ్ |