కిం నాహం పుత్రస్తవ
మాతుః సచరాచరస్య జగతోఽస్య |
కిం మాం దూరీకురుషే
దేవి గిరాం బ్రూహి కారణం తత్ర || ౧ ||
కిం చాహురాచార్యపాదా-
-స్త్వద్భక్తా మద్గురూత్తమాః పూర్వమ్ |
ఔరసతనయం మాం తవ
కస్మాద్దూరీకరోషి వద వాణి || ౨ ||
ఆనీయ దూరతో మాం
మాతస్త్వత్పాదసవిధమతికృపయా |
పరిపాల్య చ సుచిరం మాం
కస్మాద్దూరీకరోషి వద వాణి || ౩ ||
అతిపరిచయాదవజ్ఞా
ప్రభవేత్పుత్రేషు కిం సవిత్రీణామ్ |
న హి సా క్వచిదపి దృష్టా
కస్మాద్దూరీకరోషి వద వాణి || ౪ ||
కాదాచిత్కనమస్కృతి-
-కర్తౄణామప్యభీష్టదే తరసా |
నాహం సకృదపి నంతా
కస్మాద్దూరీకరోషి వద వాణి || ౫ ||
గురురూపేణాబాల్యా-
-త్సోఢ్వా మంతూంశ్చ మత్కృతాన్వివిధాన్ |
పరిరక్ష్య కరుణయా మాం
కస్మాద్దూరీకరోషి వద వాణి || ౬ ||
జగతాం పాలనమనిశం
కుర్వంత్యాస్తే భవేత్కియాన్భారః |
అహమంబ దీనవర్యః
కస్మాద్దూరీకరోషి వద వాణి || ౭ ||
పాపాన్నివార్య సరణౌ
విమలాయాం మే ప్రవర్తనే తరసా |
కర్తవ్యే సతి కృపయా
కస్మాద్దూరీకరోషి వద వాణి || ౮ ||
యద్యప్యన్యానన్యాన్
దేవానారాధయామి న త్వం తే |
సర్వాత్మికేతి చపలః
కస్మాద్దూరీకరోషి వద వాణి || ౯ ||
యాత్రాశక్తమిమం మాం
గలితశరీరమ్రుజా సమాక్రాంతమ్ |
పాత్రమహేతుదయాయాః
కస్మాద్దూరీకరోషి వద వాణి || ౧౦ ||
తవ సద్మని గురుసదనే
విద్యాతీర్థాలయే చ బహుసుఖతః |
ఖేలాం కుర్వంతం మాం
కస్మాద్దూరీకరోషి వద వాణి || ౧౧ ||
త్వత్క్షేత్రనికటరాజ-
-న్నరసింహాఖ్యాచలశృంగాగ్రే |
స్వైరవిహారకృతం మాం
కస్మాద్దూరీకరోషి వద వాణి || ౧౨ ||
త్వత్పాదపూతతుంగా-
-తీరే విజనే వనే చరంతం మామ్ |
అనుఘస్రం మోదభరాత్
కస్మాద్దూరీకరోషి వద వాణి || ౧౩ ||
తుంగాతీరే దినకర-
-నివేశనికటస్థలే విపులే |
ధ్యాయంతం పరతత్త్వం
కస్మాద్దూరీకరోషి వద వాణి || ౧౪ ||
తుంగాతీరే రఘువర-
-మందిరపురతః సుదీర్ఘపాషాణే |
కుతుకాద్విహరంతం మాం
కస్మాద్దూరీకరోషి వద వాణి || ౧౫ ||
జాతు చ నరసింహపురే
తుంగాతీరే సుసైకతే మోదాత్ |
విహృతిం కుర్వాణం మాం
కస్మాద్దూరీకరోషి వద వాణి || ౧౬ ||
యతివరకృతాత్మవిద్యా-
-విలాసమనిశం పఠంతమతిమోదాత్ |
కుహచిత్తుంగాతీరే
కస్మాద్దూరీకరోషి వద వాణి || ౧౭ ||
శంకరభగవత్పాద-
-ప్రణీతచూడామణిం వివేకాదిమ్ |
శృణ్వంతం నృహరివనే
కస్మాద్దూరీకరోషి వద వాణి || ౧౮ ||
ఇతి శ్రీసచ్చిదానందశివాభినవనృసింహభారతీస్వామిభిః విరచిత శ్రీ వాణీ ప్రశ్నమాలా స్తుతిః ||