ఋషయ ఊచుః |
జితం జితం తేఽజిత యజ్ఞభావనా
త్రయీం తనూం స్వాం పరిధున్వతే నమః |
యద్రోమగర్తేషు నిలిల్యురధ్వరా-
-స్తస్మై నమః కారణసూకరాయ తే || ౧ ||
రూపం తవైతన్నను దుష్కృతాత్మనాం
దుర్దర్శనం దేవ యదధ్వరాత్మకమ్ |
ఛందాంసి యస్య త్వచి బర్హిరోమ-
-స్వాజ్యం దృశి త్వంఘ్రిషు చాతుర్హోత్రమ్ || ౨ ||
స్రుక్తుండ ఆసీత్ స్రువ ఈశ నాసయో-
-రిడోదరే చమసాః కర్ణరంధ్రే |
ప్రాశిత్రమాస్యే గ్రసనే గ్రహాస్తు తే
యచ్చర్వణం తే భగవన్నగ్నిహోత్రమ్ || ౩ ||
దీక్షానుజన్మోపసదః శిరోధరం
త్వం ప్రాయణీయోదయనీయదంష్ట్రః |
జిహ్వా ప్రవర్గ్యస్తవ శీర్షకం క్రతోః
సభ్యావసథ్యం చితయోఽసవో హి తే || ౪ ||
సోమస్తు రేతః సవనాన్యవస్థితిః
సంస్థావిభేదాస్తవ దేవ ధాతవః |
సత్రాణి సర్వాణి శరీరసంధి-
-స్త్వం సర్వయజ్ఞక్రతురిష్టిబంధనః || ౫ ||
నమో నమస్తేఽఖిలమంత్రదేవతా
ద్రవ్యాయ సర్వక్రతవే క్రియాత్మనే |
వైరాగ్యభక్త్యాత్మజయాఽనుభావిత
జ్ఞానాయ విద్యాగురవే నమో నమః || ౬ ||
దంష్ట్రాగ్రకోట్యా భగవంస్త్వయా ధృతా
విరాజతే భూధర భూః సభూధరా |
యథా వనాన్నిఃసరతో దతా ధృతా
మతంగజేంద్రస్య సపత్రపద్మినీ || ౭ ||
త్రయీమయం రూపమిదం చ సౌకరం
భూమండలేనాథ దతా ధృతేన తే |
చకాస్తి శృంగోఢఘనేన భూయసా
కులాచలేంద్రస్య యథైవ విభ్రమః || ౮ ||
సంస్థాపయైనాం జగతాం సతస్థుషాం
లోకాయ పత్నీమసి మాతరం పితా |
విధేమ చాస్యై నమసా సహ త్వయా
యస్యాం స్వతేజోఽగ్నిమివారణావధాః || ౯ ||
కః శ్రద్ధధీతాన్యతమస్తవ ప్రభో
రసాం గతాయా భువ ఉద్విబర్హణమ్ |
న విస్మయోఽసౌ త్వయి విశ్వవిస్మయే
యో మాయయేదం ససృజేఽతివిస్మయమ్ || ౧౦ ||
విధున్వతా వేదమయం నిజం వపు-
-ర్జనస్తపః సత్యనివాసినో వయమ్ |
సటాశిఖోద్ధూతశివాంబుబిందుభి-
-ర్విమృజ్యమానా భృశమీశ పావితాః || ౧౧ ||
స వై బత భ్రష్టమతిస్తవైష తే
యః కర్మణాం పారమపారకర్మణః |
యద్యోగమాయాగుణయోగమోహితం
విశ్వం సమస్తం భగవన్ విధేహి శమ్ || ౧౨ ||
ఇతి శ్రీమద్భాగవతే మహాపురాణే తృతీయస్కంధే త్రయోదశోధ్యాయే శ్రీ యజ్ఞవరాహమూర్తి స్తుతిః |