శరచ్చంద్రవక్త్రాం లసత్పద్మహస్తాం
సరోజాభనేత్రాం స్ఫురద్రత్నమౌళిమ్ |
ఘనాకారవేణీం నిరాకారవృత్తిం
భజే శారదాం వాసరాపీఠవాసామ్ || ౧ ||
ధరాభారపోషాం సురానీకవంద్యాం
మృణాలీలసద్బాహుకేయూరయుక్తామ్ |
త్రిలోకైకసాక్షీముదారస్తనాఢ్యాం
భజే శారదాం వాసరాపీఠవాసామ్ || ౨ ||
దురాసారసంసారతీర్థాంఘ్రిపోతాం
క్వణత్స్వర్ణమాణిక్యహారాభిరామామ్ |
శరచ్చంద్రికాధౌతవాసోలసంతీం
భజే శారదాం వాసరాపీఠవాసామ్ || ౩ ||
విరించీంద్రవిష్ణ్వాదియోగీంద్ర పూజ్యాం
ప్రసన్నాం విపన్నార్తినాశాం శరణ్యామ్ |
త్రిలోకాధినాథాధినాథాం త్రిశూన్యాం
భజే శారదాం వాసరాపీఠవాసామ్ || ౪ ||
అనంతామగమ్యామనాద్యామభావ్యా-
-మభేద్యామదాహ్యామలేప్యామరూపామ్ |
అశోష్యామసంగామదేహామవాచ్యాం
భజే శారదాం వాసరాపీఠవాసామ్ || ౫ ||
మనోవాగతీతామనామ్నీమఖండా-
-మభిన్నాత్మికామద్వయాం స్వప్రకాశామ్ |
చిదానందకందాం పరంజ్యోతిరూపాం
భజే శారదాం వాసరాపీఠవాసామ్ || ౬ ||
సదానందరూపాం శుభాయోగరూపా-
-మశేషాత్మికాం నిర్గుణాం నిర్వికారామ్ |
మహావాక్యవేద్యాం విచారప్రసంగాం
భజే శారదాం వాసరాపీఠవాసామ్ || ౭ ||
ఇతి శ్రీవాల్మీకి కృత శ్రీ వాసర సరస్వతీ స్తోత్రమ్ ||