గఙ్గాధరం శశికిశోరధరం త్రిలోకీ-
రక్షాధరం నిటిలచంద్రధరం త్రిధారం ।
భస్మావధూలనధరం గిరిరాజకన్యా-
దివ్యావలోకనధరం వరదం ప్రపద్యే ॥ 1 ॥

కాశీశ్వరంసకలభక్తజనార్థిహారం
విశ్వేశ్వరం ప్రణతపాలనభవ్యభారం ।
రామేశ్వరంవిజయదానవిధానధీరం
గౌరీశ్వరంవరదహస్తధరం నమామః ॥ 2 ॥

గఙ్గోత్తమాంగకలితం లలితం విశాలం
తం మఙ్గలం గరలనీలగలం లలామమ్ ।
శ్రీముండమాల్యవలయోజ్జ్వలమఞ్జులీళం
లక్ష్మీశ్వరార్చితపదాంబుజమాభజామః ॥ 3 ॥

దారిద్ర్యదుఃఖదహనం కమనం సురాణాం
దీనార్థిదావదహనం దమనంరిపూణామ్ ।
దానం శ్రియాం ప్రణమనంభువనాధిపానాం
మానం సతాం వృషభవాహనమానమామః ॥ 4 ॥

శ్రీకృష్ణచంద్రశరణం రమనం భవాన్యాః
శశ్వత్ప్రపన్నభరణం ధరణం ధరాయాః ।
సంసారభారహరణం కరుణం వరేణ్యం
సంతాపతాపకరణం కరవై శరణ్యం ॥ 5 ॥

చణ్డీపిచణ్డిలవితుణ్డధృతాభిషేకం
శ్రీకార్తికేయకలనృత్యకలావలోకమ్ ।
నందీశ్వరాస్యవరవాద్యమహోత్సవాఢ్యం
సోల్లాసహాసగిరిజం గిరిశం తమీడే ॥ 6 ॥

శ్రీమోహినీనివిడరాగభరోపగూఢం
యోగేశ్వరేశ్వరహృదంబుజవాసరాసమ్ ।
సమ్మోహనం గిరిసుతాఞ్చితచంద్రచూడం
శ్రీవిశ్వనాథమధినాథముపైమి నిత్యం ॥ 7 ॥

ఆపద్వినశ్యతి సమృద్ధ్యతి సర్వసంపత్
విఘ్నాః ప్రయాంతి విలయం శుభమభ్యుదేతి ।
యోగ్యాంగనాప్తిరతులోత్తమపుత్రలాభో
విశ్వేశ్వరస్తవమిమం పఠతో జనస్య ॥ 8 ॥

వందీ విముక్తిమధిగచ్ఛతి తూర్ణమేతి
స్వాస్థ్యం రుజార్దిత ఉపైతి గృహం ప్రవాసీ ।
విద్యాయశోవిజయ ఇష్టసమస్తలాభః
సంపద్యతేఽస్య పఠనాత్ స్తవనస్య సర్వమ్ ॥ 9 ॥

కన్యా వరం సులభతే పఠనాదముష్య
స్తోత్రస్య ధాన్యధనవృద్ధిసుఖం సమిచ్ఛన్ ।
కిం చ ప్రసీదతి విభుః పరమో దయాలుః
శ్రీవిశ్వనాథ ఇహ సంభజతోఽస్య సాంబః ॥ 10 ॥

కాశీపీఠాధినాథేన శంకరాచార్యభిక్షుణా ।
మహేశ్వరేణ గ్రథితా స్తోత్రమాలా శివార్పితా ॥ 11 ॥

ఇతి కాశీపీఠాధీశ్వరశంకరాచార్య శ్రీస్వామి మహేశ్వరానందసరస్వతీ విరచితం
శ్రీవిశ్వనాథ మంగళ స్తోత్రం సంపూర్ణమ్ ॥