శ్రీమద్వల్లభసాగరసముదితకుందౌఘజీవదో నరః |
విశ్వసముద్ధృతదీనో జగతి శ్రీవిఠ్ఠలో జయతి || ౧ ||
మాయావాదః కులనాశనకరణే ప్రసిద్ధదిననాథః |
అపరఃకృష్ణావతారో జగతి శ్రీవిఠ్ఠలో జయతి || ౨ ||
శ్రీమద్గిరిధరపదయుగసేవనపరినిష్ఠహృత్సరోజశ్చ |
వంశస్థాపితమహిమా జగతి శ్రీవిఠ్ఠలో జయతి || ౩ ||
శ్రీమద్గోకులహిమరుచిరుచికరలబ్ధైకసచ్చకోరపదః |
పరిలసదద్భుతచరితో జగతి శ్రీవిఠ్ఠలో జయతి || ౪ ||
శారదచంద్రసమానఃశిశిరీకృతదగ్ధసకలలోకః |
విద్యాజితసురవంద్యో జగతి శ్రీవిఠ్ఠలో జయతి || ౫ ||
గోవర్ధనధరమిలనత్యాగవిధానేఽతికాతరః సుభగః |
ప్రకటితపుష్టిజభక్తిర్జగతి శ్రీవిఠ్ఠలో జయతి || ౬ ||
యజ్ఞవిధాయకచేతాః సకలప్రతిపక్షసింధువడవాగ్నిః |
కుండలశోభితగల్లో జగతి శ్రీవిఠ్ఠలో జయతి || ౭ ||
పాలితభక్తసమాజో వ్రజభువి విశదీకృతైకనవరత్నః |
వాసితగోకులనగరో జగతి శ్రీవిఠ్ఠలో జయతి || ౮ ||
నిత్యం స్తోత్రవరం తద్భక్తినియుక్తః పఠన్ స్వకీయాష్టకమ్ |
పరమపదం లభతే స చ యః కిల నిష్ఠోఽపి విఠ్ఠలస్యేదమ్ || ౯ ||
ఇతి శ్రీమద్దేవకీనందనాత్మజశ్రీరఘునాథజీకృతం శ్రీ విఠ్ఠల స్తోత్రమ్ |