స॒త్యేనోత్త॑భితా॒ భూమి॒: సూర్యే॒ణోత్త॑భితా॒ ద్యౌః |
ఋ॒తేనా॑ది॒త్యాస్తి॑ష్ఠన్తి ది॒వి సోమో॒ అధి॑ శ్రి॒తః ||౧||
సోమే॑నాది॒త్యా బ॒లిన॒: సోమే॑న పృథి॒వీ మ॒హీ |
అథో॒ నక్ష॑త్రాణామే॒షాము॒పస్థే॒ సోమ॒ ఆహి॑తః ||౨||
సోమం॑ మన్యతే పపి॒వాన్యత్స॑మ్పిం॒షన్త్యోష॑ధిమ్ |
సోమం॒ యం బ్ర॒హ్మాణో॑ వి॒దుర్న తస్యా॑శ్నాతి॒ కశ్చ॒న ||౩||
ఆ॒చ్ఛద్వి॑ధానైర్గుపి॒తో బార్హ॑తైః సోమ రక్షి॒తః |
గ్రావ్ణా॒మిచ్ఛృ॒ణ్వన్తి॑ష్ఠసి॒ న తే॑ అశ్నాతి॒ పార్థి॑వః ||౪||
యత్త్వా॑ దేవ ప్ర॒పిబ॑న్తి॒ తత॒ ఆ ప్యా॑యసే॒ పున॑: |
వా॒యుః సోమ॑స్య రక్షి॒తా సమా॑నాం॒ మాస॒ ఆకృ॑తిః ||౫||
రైభ్యా॑సీదను॒దేయీ॑ నారాశం॒సీ న్యోచ॑నీ |
సూ॒ర్యాయా॑ భ॒ద్రమిద్వాసో॒ గాథ॑యైతి॒ పరి॑ష్కృతమ్ ||౬||
చిత్తి॑రా ఉప॒బర్హ॑ణం॒ చక్షు॑రా అ॒భ్యఞ్జ॑నమ్ |
ద్యౌర్భూమి॒: కోశ॑ ఆసీ॒ద్యదయా॑త్సూ॒ర్యా పతి॑మ్ ||౭||
స్తోమా॑ ఆసన్ప్రతి॒ధయ॑: కు॒రీరం॒ ఛన్ద॑ ఓప॒శః |
సూ॒ర్యాయా॑ అ॒శ్వినా॑ వ॒రాఽగ్నిరా॑సీత్పురోగ॒వః ||౮||
సోమో॑ వధూ॒యుర॑భవద॒శ్వినా॑స్తాము॒భా వ॒రా |
సూ॒ర్యాం యత్పత్యే॒ శంస॑న్తీం॒ మన॑సా సవి॒తాద॑దాత్ ||౯||
మనో॑ అస్యా॒ అన॑ ఆసీ॒ద్ద్యౌరా॑సీదు॒త చ్ఛ॒దిః |
శు॒క్రావ॑న॒డ్వాహా॑వాస్తాం॒ యదయా॑త్సూ॒ర్యా గృ॒హమ్ ||౧౦||
ఋ॒క్సా॒మాభ్యా॑మ॒భిహి॑తౌ॒ గావౌ॑ తే సామ॒నావి॑తః |
శ్రోత్రం॑ తే చ॒క్రే ఆ॑స్తాం ది॒వి పన్థా॑శ్చరాచా॒రః ||౧౧||
శుచీ॑ తే చ॒క్రే యా॒త్యా వ్యా॒నో అక్ష॒ ఆహ॑తః |
అనో॑ మన॒స్మయం॑ సూ॒ర్యాఽఽరో॑హత్ప్రయ॒తీ పతి॑మ్ ||౧౨||
సూ॒ర్యాయా॑ వహ॒తుః ప్రాగా॑త్సవి॒తా యమ॒వాసృ॑జత్ |
అ॒ఘాసు॑ హన్యన్తే॒ గావోఽర్జు॑న్యో॒: పర్యు॑హ్యతే ||౧౩||
యద॑శ్వినా పృ॒చ్ఛమా॑నా॒వయా॑తం త్రిచ॒క్రేణ॑ వహ॒తుం సూ॒ర్యాయా॑: |
విశ్వే॑ దే॒వా అను॒ తద్వా॑మజానన్పు॒త్రః పి॒తరా॑వవృణీత పూ॒షా ||౧౪||
యదయా॑తం శుభస్పతీ వరే॒యం సూ॒ర్యాముప॑ |
క్వైకం॑ చ॒క్రం వా॑మాసీ॒త్క్వ॑ దే॒ష్ట్రాయ॑ తస్థథుః ||౧౫||
ద్వే తే॑ చ॒క్రే సూ॑ర్యే బ్ర॒హ్మాణ॑ ఋతు॒థా వి॑దుః |
అథైకం॑ చ॒క్రం యద్గుహా॒ తద॑ద్ధా॒తయ॒ ఇద్వి॑దుః ||౧౬||
సూ॒ర్యాయై॑ దే॒వేభ్యో॑ మి॒త్రాయ॒ వరు॑ణాయ చ |
యే భూ॒తస్య॒ ప్రచే॑తస ఇ॒దం తేభ్యో॑ఽకరం॒ నమ॑: ||౧౭||
పూ॒ర్వా॒ప॒రం చ॑రతో మా॒యయై॒తౌ శిశూ॒ క్రీళ॑న్తౌ॒ పరి॑ యాతో అధ్వ॒రమ్ |
విశ్వా॑న్య॒న్యో భువ॑నాభి॒చష్ట॑ ఋ॒తూఁర॒న్యో వి॒దధ॑జ్జాయతే॒ పున॑: ||౧౮||
నవో॑నవో భవతి॒ జాయ॑మా॒నోఽహ్నాం॑ కే॒తురు॒షసా॑మే॒త్యగ్ర॑మ్ |
భా॒గం దే॒వేభ్యో॒ వి ద॑ధాత్యా॒యన్ప్ర చ॒న్ద్రమా॑స్తిరతే దీ॒ర్ఘమాయు॑: ||౧౯||
సు॒కిం॒శు॒కం శ॑ల్మ॒లిం వి॒శ్వరూ॑పం॒ హిర॑ణ్యవర్ణం సు॒వృతం॑ సుచ॒క్రమ్ |
ఆ రో॑హ సూర్యే అ॒మృత॑స్య లో॒కం స్యో॒నం పత్యే॑ వహ॒తుం కృ॑ణుష్వ ||౨౦||
ఉదీ॒ర్ష్వాత॒: పతి॑వతీ॒ హ్యే॒౩షా వి॒శ్వావ॑సుం॒ నమ॑సా గీ॒ర్భిరీ॑ళే |
అ॒న్యామి॑చ్ఛ పితృ॒షదం॒ వ్య॑క్తాం॒ స తే॑ భా॒గో జ॒నుషా॒ తస్య॑ విద్ధి ||౨౧||
ఉదీ॒ర్ష్వాతో॑ విశ్వావసో॒ నమ॑సేళా మహే త్వా |
అ॒న్యామి॑చ్ఛ ప్రఫ॒ర్వ్యం౧ సం జా॒యాం పత్యా॑ సృజ ||౨౨||
అ॒నృ॒క్ష॒రా ఋ॒జవ॑: సన్తు॒ పన్థా॒ యేభి॒: సఖా॑యో॒ యన్తి॑ నో వరే॒యమ్ |
సమ॑ర్య॒మా సం భగో॑ నో నినీయా॒త్సం జా॑స్ప॒త్యం సు॒యమ॑మస్తు దేవాః ||౨౩||
ప్ర త్వా॑ ముఞ్చామి॒ వరు॑ణస్య॒ పాశా॒ద్యేన॒ త్వాబ॑ధ్నాత్సవి॒తా సు॒శేవ॑: |
ఋ॒తస్య॒ యోనౌ॑ సుకృ॒తస్య॑ లో॒కేఽరి॑ష్టాం త్వా స॒హ పత్యా॑ దధామి ||౨౪||
ప్రేతో ము॒ఞ్చామి॒ నాముత॑: సుబ॒ద్ధామ॒ముత॑స్కరమ్ |
యథే॒యమి॑న్ద్ర మీఢ్వః సుపు॒త్రా సు॒భగాస॑తి ||౨౫||
పూ॒షా త్వే॒తో న॑యతు హస్త॒గృహ్యా॒ఽశ్వినా॑ త్వా॒ ప్ర వ॑హతాం॒ రథే॑న |
గృ॒హాన్గ॑చ్ఛ గృ॒హప॑త్నీ॒ యథాసో॑ వ॒శినీ॒ త్వం వి॒దథ॒మా వ॑దాసి ||౨౬||
ఇ॒హ ప్రి॒యం ప్ర॒జయా॑ తే॒ సమృ॑ధ్యతామ॒స్మిన్గృ॒హే గార్హ॑పత్యాయ జాగృహి |
ఏ॒నా పత్యా॑ త॒న్వం౧ సం సృ॑జ॒స్వాధా॒ జివ్రీ॑ వి॒దథ॒మా వ॑దాథః ||౨౭||
నీ॒ల॒లో॒హి॒తం భ॑వతి కృ॒త్యాస॒క్తిర్వ్య॑జ్యతే |
ఏధ॑న్తే అస్యా జ్ఞా॒తయ॒: పతి॑ర్బ॒న్ధేషు॑ బధ్యతే ||౨౮||
పరా॑ దేహి శాము॒ల్యం॑ బ్ర॒హ్మభ్యో॒ వి భ॑జా॒ వసు॑ |
కృ॒త్యైషా ప॒ద్వతీ॑ భూ॒త్వ్యా జా॒యా వి॑శతే॒ పతి॑మ్ ||౨౯||
అ॒శ్రీ॒రా త॒నూర్భ॑వతి॒ రుశ॑తీ పా॒పయా॑ము॒యా |
పతి॒ర్యద్వ॒ధ్వో॒౩ వాస॑సా॒ స్వమఙ్గ॑మభి॒ధిత్స॑తే ||౩౦||
యే వ॒ధ్వ॑శ్చ॒న్ద్రం వ॑హ॒తుం యక్ష్మా॒ యన్తి॒ జనా॒దను॑ |
పున॒స్తాన్య॒జ్ఞియా॑ దే॒వా నయ॑న్తు॒ యత॒ ఆగ॑తాః ||౩౧||
మా వి॑దన్పరిప॒న్థినో॒ య ఆ॒సీద॑న్తి॒ దమ్ప॑తీ |
సు॒గేభి॑ర్దు॒ర్గమతీ॑తా॒మప॑ ద్రా॒న్త్వరా॑తయః ||౩౨||
సు॒మ॒ఙ్గ॒లీరి॒యం వ॒ధూరి॒మాం స॒మేత॒ పశ్య॑త |
సౌభా॑గ్యమస్యై ద॒త్త్వాయాఽథాస్తం॒ వి పరే॑తన ||౩౩||
తృ॒ష్టమే॒తత్కటు॑కమే॒తద॑పా॒ష్ఠవ॑ద్వి॒షవ॒న్నైతదత్త॑వే |
సూ॒ర్యాం యో బ్ర॒హ్మా వి॒ద్యాత్స ఇద్వాధూ॑యమర్హతి ||౩౪||
ఆ॒శస॑నం వి॒శస॑న॒మథో॑ అధివి॒కర్త॑నమ్ |
సూ॒ర్యాయా॑: పశ్య రూ॒పాణి॒ తాని॑ బ్ర॒హ్మా తు శు॑న్ధతి ||౩౫||
గృ॒భ్ణామి॑ తే సౌభగ॒త్వాయ॒ హస్తం॒ మయా॒ పత్యా॑ జ॒రద॑ష్టి॒ర్యథాస॑: |
భగో॑ అర్య॒మా స॑వి॒తా పురం॑ధి॒ర్మహ్యం॑ త్వాదు॒ర్గార్హ॑పత్యాయ దే॒వాః ||౩౬||
తాం పూ॑షఞ్ఛి॒వత॑మా॒మేర॑యస్వ॒ యస్యాం॒ బీజం॑ మను॒ష్యా॒౩ వప॑న్తి |
యా న॑ ఊ॒రూ ఉ॑శ॒తీ వి॒శ్రయా॑తే॒ యస్యా॑ము॒శన్త॑: ప్ర॒హరా॑మ॒ శేప॑మ్ ||౩౭||
తుభ్య॒మగ్రే॒ పర్య॑వహన్త్సూ॒ర్యాం వ॑హ॒తునా॑ స॒హ |
పున॒: పతి॑భ్యో జా॒యాం దా అ॑గ్నే ప్ర॒జయా॑ స॒హ ||౩౮||
పున॒: పత్నీ॑మ॒గ్నిర॑దా॒దాయు॑షా స॒హ వర్చ॑సా |
దీ॒ర్ఘాయు॑రస్యా॒ యః పతి॒ర్జీవా॑తి శ॒రద॑: శ॒తమ్ ||౩౯||
సోమ॑: ప్రథ॒మో వి॑విదే గన్ధ॒ర్వో వి॑విద॒ ఉత్త॑రః |
తృ॒తీయో॑ అ॒గ్నిష్టే॒ పతి॑స్తు॒రీయ॑స్తే మనుష్య॒జాః ||౪౦||
సోమో॑ దదద్గన్ధ॒ర్వాయ॑ గన్ధ॒ర్వో ద॑దద॒గ్నయే॑ |
ర॒యిం చ॑ పు॒త్రాఁశ్చా॑దాద॒గ్నిర్మహ్య॒మథో॑ ఇ॒మామ్ ||౪౧||
ఇ॒హైవ స్తం॒ మా వి యౌ॑ష్టం॒ విశ్వ॒మాయు॒ర్వ్య॑శ్నుతమ్ |
క్రీళ॑న్తౌ పు॒త్రైర్నప్తృ॑భి॒ర్మోద॑మానౌ॒ స్వే గృ॒హే ||౪౨||
ఆ న॑: ప్ర॒జాం జ॑నయతు ప్ర॒జాప॑తిరాజర॒సాయ॒ సమ॑నక్త్వర్య॒మా |
అదు॑ర్మఙ్గలీః పతిలో॒కమా వి॑శ॒ శం నో॑ భవ ద్వి॒పదే॒ శం చతు॑ష్పదే ||౪౩||
అఘో॑రచక్షు॒రప॑తిఘ్న్యేధి శి॒వా ప॒శుభ్య॑: సు॒మనా॑: సు॒వర్చా॑: |
వీ॒ర॒సూర్దే॒వకా॑మా స్యో॒నా శం నో॑ భవ ద్వి॒పదే॒ శం చతు॑ష్పదే ||౪౪||
ఇ॒మాం త్వమి॑న్ద్ర మీఢ్వః సుపు॒త్రాం సు॒భగాం॑ కృణు |
దశా॑స్యాం పు॒త్రానా ధే॑హి॒ పతి॑మేకాద॒శం కృ॑ధి ||౪౫||
స॒మ్రాజ్ఞీ॒ శ్వశు॑రే భవ స॒మ్రాజ్ఞీ॑ శ్వ॒శ్ర్వాం భ॑వ |
ననా॑న్దరి స॒మ్రాజ్ఞీ॑ భవ స॒మ్రాజ్ఞీ॒ అధి॑ దే॒వృషు॑ ||౪౬||
సమ॑ఞ్జన్తు॒ విశ్వే॑ దే॒వాః సమాపో॒ హృద॑యాని నౌ |
సం మా॑త॒రిశ్వా॒ సం ధా॒తా సము॒ దేష్ట్రీ॑ దధాతు నౌ ||౪౭||
మరిన్ని వేదసూక్తములు చూడండి.