ಶರಚ್ಚಂದ್ರವಕ್ತ್ರಾಂ ಲಸತ್ಪದ್ಮಹಸ್ತಾಂ
ಸರೋಜಾಭನೇತ್ರಾಂ ಸ್ಫುರದ್ರತ್ನಮೌಳಿಂ |
ಘನಾಕಾರವೇಣೀಂ ನಿರಾಕಾರವೃತ್ತಿಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೧ ||
ಧರಾಭಾರಪೋಷಾಂ ಸುರಾನೀಕವಂದ್ಯಾಂ
ಮೃಣಾಲೀಲಸದ್ಬಾಹುಕೇಯೂರಯುಕ್ತಾಂ |
ತ್ರಿಲೋಕೈಕಸಾಕ್ಷೀಮುದಾರಸ್ತನಾಢ್ಯಾಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೨ ||
ದುರಾಸಾರಸಂಸಾರತೀರ್ಥಾಂಘ್ರಿಪೋತಾಂ
ಕ್ವಣತ್ಸ್ವರ್ಣಮಾಣಿಕ್ಯಹಾರಾಭಿರಾಮಾಂ |
ಶರಚ್ಚಂದ್ರಿಕಾಧೌತವಾಸೋಲಸಂತೀಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೩ ||
ವಿರಿಂಚೀಂದ್ರವಿಷ್ಣ್ವಾದಿಯೋಗೀಂದ್ರ ಪೂಜ್ಯಾಂ
ಪ್ರಸನ್ನಾಂ ವಿಪನ್ನಾರ್ತಿನಾಶಾಂ ಶರಣ್ಯಾಂ |
ತ್ರಿಲೋಕಾಧಿನಾಥಾಧಿನಾಥಾಂ ತ್ರಿಶೂನ್ಯಾಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೪ ||
ಅನಂತಾಮಗಮ್ಯಾಮನಾದ್ಯಾಮಭಾವ್ಯಾ-
-ಮಭೇದ್ಯಾಮದಾಹ್ಯಾಮಲೇಪ್ಯಾಮರೂಪಾಂ |
ಅಶೋಷ್ಯಾಮಸಂಗಾಮದೇಹಾಮವಾಚ್ಯಾಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೫ ||
ಮನೋವಾಗತೀತಾಮನಾಮ್ನೀಮಖಂಡಾ-
-ಮಭಿನ್ನಾತ್ಮಿಕಾಮದ್ವಯಾಂ ಸ್ವಪ್ರಕಾಶಾಂ |
ಚಿದಾನಂದಕಂದಾಂ ಪರಂಜ್ಯೋತಿರೂಪಾಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೬ ||
ಸದಾನಂದರೂಪಾಂ ಶುಭಾಯೋಗರೂಪಾ-
-ಮಶೇಷಾತ್ಮಿಕಾಂ ನಿರ್ಗುಣಾಂ ನಿರ್ವಿಕಾರಾಂ |
ಮಹಾವಾಕ್ಯವೇದ್ಯಾಂ ವಿಚಾರಪ್ರಸಂಗಾಂ
ಭಜೇ ಶಾರದಾಂ ವಾಸರಾಪೀಠವಾಸಾಂ || ೭ ||
ಇತಿ ಶ್ರೀವಾಲ್ಮೀಕಿ ಕೃತ ಶ್ರೀ ವಾಸರ ಸರಸ್ವತೀ ಸ್ತೋತ್ರಂ ||