വിരാടനഗരം രമ്യം ഗച്ഛമാനോ യുധിഷ്ഠിരഃ |
അസ്തുവന്മനസാ ദേവീം ദുർഗാം ത്രിഭുവനേശ്വരീം || 1 ||
യശോദാഗർഭസംഭൂതാം നാരായണവരപ്രിയാം |
നന്ദഗോപകുലേ ജാതാം മംഗള്യാം കുലവർധിനീം || 2 ||
കംസവിദ്രാവണകരീമസുരാണാം ക്ഷയങ്കരീം |
ശിലാതടവിനിക്ഷിപ്താമാകാശം പ്രതി ഗാമിനീം || 3 ||
വാസുദേവസ്യ ഭഗിനീം ദിവ്യമാല്യവിഭൂഷിതാം |
ദിവ്യാംബരധരാം ദേവീം ഖഡ്ഗഖേടകധാരിണീം || 4 ||
ഭാരാവതരണേ പുണ്യേ യേ സ്മരന്തി സദാശിവാം |
താൻ വൈ താരയതേ പാപാത് പങ്കേ ഗാമിവ ദുർബലാം || 5 ||
സ്തോതും പ്രചക്രമേ ഭൂയോ വിവിധൈഃ സ്തോത്രസംഭവൈഃ |
ആമന്ത്ര്യ ദർശനാകാങ്ക്ഷീ രാജാ ദേവീം സഹാനുജഃ || 6 ||
നമോഽസ്തു വരദേ കൃഷ്ണേ കുമാരി ബ്രഹ്മചാരിണി |
ബാലാർകസദൃശാകാരേ പൂർണചന്ദ്രനിഭാനനേ || 7 ||
ചതുർഭുജേ ചതുർവക്ത്രേ പീനശ്രോണിപയോധരേ |
മയൂരപിച്ഛവലയേ കേയൂരാംഗദധാരിണി || 8 ||
ഭാസി ദേവി യഥാ പദ്മാ നാരായണപരിഗ്രഹഃ |
സ്വരൂപം ബ്രഹ്മചര്യം ച വിശദം തവ ഖേചരി || 9 ||
കൃഷ്ണച്ഛവിസമാ കൃഷ്ണാ സങ്കർഷണസമാനനാ |
ബിഭ്രതീ വിപുലൗ ബാഹൂ ശക്രധ്വജസമുച്ഛ്രയൗ || 10 ||
പാത്രീ ച പങ്കജീ ഘണ്ടീ സ്ത്രീവിശുദ്ധാ ച യാ ഭുവി |
പാശം ധനുർമഹാചക്രം വിവിധാന്യായുധാനി ച || 11 ||
കുണ്ഡലാഭ്യാം സുപൂർണാഭ്യാം കർണാഭ്യാം ച വിഭൂഷിതാ |
ചന്ദ്രവിസ്പർധിനാ ദേവി മുഖേന ത്വം വിരാജസേ || 12 ||
മുകുടേന വിചിത്രേണ കേശബന്ധേന ശോഭിനാ |
ഭുജംഗാഭോഗവാസേന ശ്രോണിസൂത്രേണ രാജതാ || 13 ||
വിഭ്രാജസേ ചാബദ്ധേന ഭോഗേനേവേഹ മന്ദരഃ |
ധ്വജേന ശിഖിപിച്ഛാനാമുച്ഛ്രിതേന വിരാജസേ || 14 ||
കൗമാരം വ്രതമാസ്ഥായ ത്രിദിവം പാവിതം ത്വയാ |
തേന ത്വം സ്തൂയസേ ദേവി ത്രിദശൈഃ പൂജ്യസേഽപി ച || 15 ||
ത്രൈലോക്യരക്ഷണാർഥായ മഹിഷാസുരനാശിനി |
പ്രസന്നാ മേ സുരശ്രേഷ്ഠേ ദയാം കുരു ശിവാ ഭവ || 16 ||
ജയാ ത്വം വിജയാ ചൈവ സംഗ്രാമേ ച ജയപ്രദാ |
മമാപി വിജയം ദേഹി വരദാ ത്വം ച സാമ്പ്രതം || 17 ||
വിന്ധ്യേ ചൈവ നഗശ്രേഷ്ഠേ തവ സ്ഥാനം ഹി ശാശ്വതം |
കാളി കാളി മഹാകാളി ശീധുമാംസപശുപ്രിയേ || 18 ||
കൃതാനുയാത്രാ ഭൂതൈസ്ത്വം വരദാ കാമചാരിണീ |
ഭാരാവതാരേ യേ ച ത്വാം സംസ്മരിഷ്യന്തി മാനവാഃ || 19 ||
പ്രണമന്തി ച യേ ത്വാം ഹി പ്രഭാതേ തു നരാ ഭുവി |
ന തേഷാം ദുർലഭം കിഞ്ചിത് പുത്രതോ ധനതോഽപി വാ || 20 ||
ദുർഗാത് താരയസേ ദുർഗേ തത് ത്വം ദുർഗാ സ്മൃതാ ജനൈഃ |
കാന്താരേഷ്വവസന്നാനാം മഗ്നാനാം ച മഹാർണവേ |
ദസ്യുഭിർവാ നിരുദ്ധാനാം ത്വം ഗതിഃ പരമാ നൃണാം || 21 ||
ജലപ്രതരണേ ചൈവ കാന്താരേഷ്വടവീഷു ച |
യേ സ്മരന്തി മഹാദേവി ന ച സീദന്തി തേ നരാഃ || 22 ||
ത്വം കീർതിഃ ശ്രീർധൃതിഃ സിദ്ധിർഹ്രീർവിദ്യാ സന്തതിർമതിഃ |
സന്ധ്യാ രാത്രിഃ പ്രഭാ നിദ്രാ ജ്യോത്സ്നാ കാന്തിഃ ക്ഷമാ ദയാ || 23 ||
നൃണാം ച ബന്ധനം മോഹം പുത്രനാശം ധനക്ഷയം |
വ്യാധിം മൃത്യും ഭയം ചൈവ പൂജിതാ നാശയിഷ്യസി || 24 ||
സോഽഹം രാജ്യാത്പരിഭ്രഷ്ടഃ ശരണം ത്വാം പ്രപന്നവാൻ |
പ്രണതശ്ച യഥാ മൂർധ്നാ തവ ദേവി സുരേശ്വരി || 25 ||
ത്രാഹി മാം പദ്മപത്രാക്ഷി സത്യേ സത്യാ ഭവസ്വ നഃ |
ശരണം ഭവ മേ ദുർഗേ ശരണ്യേ ഭക്തവത്സലേ || 26 ||
ഏവം സ്തുതാ ഹി സാ ദേവീ ദർശയാമാസ പാണ്ഡവം |
ഉപഗമ്യ തു രാജാനാമിദം വചനമബ്രവീത് || 27 ||
ദേവ്യുവാച |
ശൃണു രാജൻ മഹാബാഹോ മദീയം വചനം പ്രഭോ |
ഭവിഷ്യത്യചിരാദേവ സംഗ്രാമേ വിജയസ്തവ || 28 ||
മമ പ്രസാദാന്നിർജിത്യ ഹത്വാ കൗരവവാഹിനീം |
രാജ്യം നിഷ്കണ്ടകം കൃത്വാ ഭോക്ഷ്യസേ മേദിനീം പുനഃ || 29 ||
ഭാത്രൃഭിഃ സഹിതോ രാജൻ പ്രീതിം പ്രാപ്സ്യസി പുഷ്കലാം |
മത്പ്രസാദാച്ച തേ സൗഖ്യമാരോഗ്യം ച ഭവിഷ്യതി || 30 ||
യേ ച സങ്കീർതയിഷ്യന്തി ലോകേ വിഗതകല്മഷാഃ |
തേഷാം തുഷ്ടാ പ്രദാസ്യാമി രാജ്യമായുർവപുഃ സുതം || 31 ||
പ്രവാസേ നഗരേ ചാപി സംഗ്രാമേ ശത്രുസങ്കടേ |
അടവ്യാം ദുർഗകാന്താരേ സാഗരേ ഗഹനേ ഗിരൗ || 32 ||
യേ സ്മരിഷ്യന്തി മാം രാജൻ യഥാഽഹം ഭവതാ സ്മൃതാ |
ന തേഷാം ദുർലഭം കിഞ്ചിദസ്മില്ലോകേ ഭവിഷ്യതി || 33 ||
ഇദം സ്തോത്രവരം ഭക്ത്യാ ശൃണുയാദ്വാ പഠേത വാ |
തസ്യ സർവാണി കാര്യാണി സിദ്ധിം യാസ്യന്തി പാണ്ഡവാഃ || 34 ||
മത്പ്രസാദാച്ച വഃ സർവാന്വിരാടനഗരേ സ്ഥിതാൻ |
ന പ്രജ്ഞാസ്യന്തി കുരവോ നരാ വാ തന്നിവാസിനഃ || 35 ||
ഇത്യുക്ത്വാ വരദാ ദേവീ യുധിഷ്ഠിരമരിന്ദമം |
രക്ഷാം കൃത്വാ ച പാണ്ഡൂനാം തത്രൈവാന്തരധീയത || 36 ||
ഇതി ശ്രീമന്മഹാഭാരതേ വിരാടപർവണി അഷ്ടമോഽധ്യായേ യുധിഷ്ഠിര കൃത ശ്രീ ദുർഗാ സ്തോത്രം |