നവാംബുദാനീകമനോഹരായ
പ്രഫുല്ലരാജീവവിലോചനായ |
വേണുസ്വനൈർമോദിതഗോകുലായ
നമോഽസ്തു ഗോപീജനവല്ലഭായ || 1 ||
കിരീടകേയൂരവിഭൂഷിതായ
ഗ്രൈവേയമാലാമണിരഞ്ജിതായ |
സ്ഫുരച്ചലത്കാഞ്ചനകുണ്ഡലായ
നമോഽസ്തു ഗോപീജനവല്ലഭായ || 2 ||
ദിവ്യാംഗനാബൃന്ദനിഷേവിതായ
സ്മിതപ്രഭാചാരുമുഖാംബുജായ |
ത്രൈലോക്യസമ്മോഹനസുന്ദരായ
നമോഽസ്തു ഗോപീജനവല്ലഭായ || 3 ||
രത്നാദിമൂലാലയസംഗതായ
കല്പദ്രുമച്ഛായസമാശ്രിതായ |
ഹേമസ്ഫുരന്മണ്ഡലമധ്യഗായ
നമോഽസ്തു ഗോപീജനവല്ലഭായ || 4 ||
ശ്രീവത്സരോമാവളിരഞ്ജിതായ
വക്ഷഃസ്ഥലേ കൗസ്തുഭഭൂഷിതായ |
സരോജകിഞ്ജൽകനിഭാംശുകായ
നമോഽസ്തു ഗോപീജനവല്ലഭായ || 5 ||
ദിവ്യാംഗുളീയാംഗുളിരഞ്ജിതായ
മയൂരപിഞ്ഛച്ഛവിശോഭിതായ |
വന്യസ്രജാലങ്കൃതവിഗ്രഹായ
നമോഽസ്തു ഗോപീജനവല്ലഭായ || 6 ||
മുനീന്ദ്രവൃന്ദൈരഭിസംസ്തുതായ
ക്ഷരത്പയോഗോകുലസങ്കുലായ |
ധർമാർഥകാമാമൃതസാധകായ
നമോഽസ്തു ഗോപീജനവല്ലഭായ || 7 ||
മനസ്തമസ്തോമദിവാകരായ
ഭക്തസ്യ ചിന്താമണിസാധകായ |
അശേഷദുഃഖാമയഭേഷജായ
നമോഽസ്തു ഗോപീജനവല്ലഭായ || 8 ||
ഇതി ശ്രീവഹ്നിസൂനു വിരചിതം ശ്രീ ഗോപീജനവല്ലഭാഷ്ടകം |