ଅର୍ଜୁନ ଉଵାଚ |
ନମସ୍ତେ ସିଦ୍ଧସେନାନି ଆର୍ୟେ ମନ୍ଦରଵାସିନି |
କୁମାରି କାଲି କାପାଲି କପିଲେ କୃଷ୍ଣପିଙ୍ଗଲେ || ୧ ||
ଭଦ୍ରକାଲି ନମସ୍ତୁଭ୍ୟଂ ମହାକାଲି ନମୋଽସ୍ତୁ ତେ |
ଚଣ୍ଡି ଚଣ୍ଡେ ନମସ୍ତୁଭ୍ୟଂ ତାରିଣି ଵରଵର୍ଣିନି || ୨ ||
କାତ୍ୟାୟନି ମହାଭାଗେ କରାଲି ଵିଜୟେ ଜୟେ |
ଶିଖିପିଞ୍ଛଧ୍ଵଜଧରେ ନାନାଭରଣଭୂଷିତେ || ୩ ||
ଅଟ୍ଟଶୂଲପ୍ରହରଣେ ଖଡ୍ଗଖେଟକଧାରିଣି |
ଗୋପେନ୍ଦ୍ରସ୍ୟାନୁଜେ ଜ୍ୟେଷ୍ଠେ ନନ୍ଦଗୋପକୁଲୋଦ୍ଭଵେ || ୪ ||
ମହିଷାସୃକ୍ପ୍ରିୟେ ନିତ୍ୟଂ କୌଶିକି ପୀତଵାସିନି |
ଅଟ୍ଟହାସେ କୋକମୁଖେ ନମସ୍ତେଽସ୍ତୁ ରଣପ୍ରିୟେ || ୫ ||
ଉମେ ଶାକମ୍ଭରି ଶ୍ଵେତେ କୃଷ୍ଣେ କୈଟଭନାଶିନି |
ହିରଣ୍ୟାକ୍ଷି ଵିରୂପାକ୍ଷି ସୁଧୂମ୍ରାକ୍ଷି ନମୋଽସ୍ତୁ ତେ || ୬ ||
ଵେଦଶ୍ରୁତିମହାପୁଣ୍ୟେ ବ୍ରହ୍ମଣ୍ୟେ ଜାତଵେଦସି |
ଜମ୍ବୂକଟକଚୈତ୍ୟେଷୁ ନିତ୍ୟଂ ସନ୍ନିହିତାଲୟେ || ୭ ||
ତ୍ଵଂ ବ୍ରହ୍ମଵିଦ୍ୟା ଵିଦ୍ୟାନାଂ ମହାନିଦ୍ରା ଚ ଦେହିନାମ୍ |
ସ୍କନ୍ଦମାତର୍ଭଗଵତି ଦୁର୍ଗେ କାନ୍ତାରଵାସିନି || ୮ ||
ସ୍ଵାହାକାରଃ ସ୍ଵଧା ଚୈଵ କଲା କାଷ୍ଠା ସରସ୍ଵତୀ |
ସାଵିତ୍ରୀ ଵେଦମାତା ଚ ତଥା ଵେଦାନ୍ତ ଉଚ୍ୟତେ || ୯ ||
ସ୍ତୁତାସି ତ୍ଵଂ ମହାଦେଵି ଵିଶୁଦ୍ଧେନାନ୍ତରାତ୍ମନା |
ଜୟୋ ଭଵତୁ ମେ ନିତ୍ୟଂ ତ୍ଵତ୍ପ୍ରସାଦାଦ୍ରଣାଜିରେ || ୧୦ ||
କାନ୍ତାରଭୟଦୁର୍ଗେଷୁ ଭକ୍ତାନାଂ ଚାଲୟେଷୁ ଚ |
ନିତ୍ୟଂ ଵସସି ପାତାଲେ ୟୁଦ୍ଧେ ଜୟସି ଦାନଵାନ୍ || ୧୧ ||
ତ୍ଵଂ ଜମ୍ଭନୀ ମୋହିନୀ ଚ ମାୟା ହ୍ରୀଃ ଶ୍ରୀସ୍ତଥୈଵ ଚ |
ସନ୍ଧ୍ୟା ପ୍ରଭାଵତୀ ଚୈଵ ସାଵିତ୍ରୀ ଜନନୀ ତଥା || ୧୨ ||
ତୁଷ୍ଟିଃ ପୁଷ୍ଟିର୍ଧୃତିର୍ଦୀପ୍ତିଶ୍ଚନ୍ଦ୍ରାଦିତ୍ୟଵିଵର୍ଧିନୀ |
ଭୂତିର୍ଭୂତିମତାଂ ସଙ୍ଖ୍ୟେ ଵୀକ୍ଷ୍ୟସେ ସିଦ୍ଧଚାରଣୈଃ || ୧୩ ||
ଇତି ଶ୍ରୀମନ୍ମହାଭାରତେ ଭୀଷ୍ମପର୍ଵଣି ତ୍ରୟୋଵିଂଶୋଽଧ୍ୟାୟେ ଅର୍ଜୁନ କୃତ ଶ୍ରୀ ଦୁର୍ଗା ସ୍ତୋତ୍ରମ୍ |