వేణీం సితేతరసమీరణభోజితుల్యాం
వాణీం చ కేకికులగర్వహరాం వహంతీమ్ |
శ్రోణీం గిరిస్మయవిభేదచణాం దధానాం
వాణీమనన్యశరణః శరణం ప్రపద్యే || ౧ ||
వాచః ప్రయత్నమనపేక్ష్య ముఖారవిందా-
-ద్వాతాహతాబ్ధిలహరీమదహారదక్షాః |
వాదేషు యత్కరుణయా ప్రగలంతి తాం త్వాం
వాణీమనన్యశరణః శరణం ప్రపద్యే || ౨ ||
రాకాశశాంకసదృశాననపంకజాతాం
శోకాపహారచతురాంఘ్రిసరోజపూజామ్ |
పాకారిముఖ్యదివిషత్ప్రవరేడ్యమానాం
వాణీమనన్యశరణః శరణం ప్రపద్యే || ౩ ||
బాలోడుపప్రవిలసత్కచమధ్యభాగాం
నీలోత్పలప్రతిభటాక్షివిరాజమానామ్ |
కాలోన్మిషత్కిసలయారుణపాదపద్మాం
వాణీమనన్యశరణః శరణం ప్రపద్యే || ౪ ||
ఇతి శృంగేరి శ్రీజగద్గురు శ్రీసచ్చిదానందశివాభినవనృసింహభారతీస్వామిభిః విరచితం శ్రీ వాణీ శరణాగతి స్తోత్రమ్ ||