યઃ શ્રીગોવર્ધનાદ્રિં સકલસુરપતિં ત્રસ્તગોગોપવૃંદં
સ્વીયં સંરક્ષિતું ચેત્યમરસુખકરં મોહયન્ સંદધાર |
તન્માનં ખંડયિત્વા વિજિતરિપુકુલો નીલધારાધરાભઃ
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૧ ||
યં દૃષ્ટ્વા કંસભૂપઃ સ્વકૃતકૃતિમહો સંસ્મરન્મંત્રિવર્યાન્
કિં વાઽપૂર્વં મયેદં કૃતમિતિ વચનં દુઃખિતઃ પ્રત્યુવાચ |
આજ્ઞપ્તો નારદેન સ્મિતયુતવદનઃ પૂરયન્ સર્વકામાન્
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૨ ||
યેન પ્રોદ્યત્ પ્રતાપા નૃપતિકુલભવાઃ પાંડવાઃ કૌરવાબ્ધિં
તીર્ત્વા પારં તદીયં જગદખિલનૃણાં દુસ્તરં ચેતિ જગ્મુઃ |
તત્પત્નીચીરવૃદ્ધિપ્રવિદિતમહિમા ભૂતલે ભૂપતીશઃ
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૩ ||
યસ્મૈ ચોદ્ધૃત્ય પાત્રાદ્દધિયુતનવનીતં કરૈર્ગોપિકાભિ-
-ર્દત્તં તદ્ભાવપૂર્તૌ વિનિહિતહૃદયઃ સત્યમેવં તિરોધાત્ |
મુક્તાગુંજાવળીભિઃ પ્રચુરતમરુચિઃ કુંડલાક્રાંતગંડઃ
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૪ ||
યસ્માદ્વિશ્વાભિરામાદિહ જનનવિધૌ સર્વનંદાદિગોપાઃ
સંસારાર્તેર્વિમુક્તાઃ સકલસુખકરાઃ સંપદઃ પ્રાપુરેવ |
ઇત્થં પૂર્ણેંદુવક્ત્રઃ કલકમલદૃશઃ સ્વીયજન્મ સ્તુવંતઃ
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૫ ||
યસ્ય શ્રીનંદસૂનોર્વ્રજયુવતિજનાશ્ચાગતા ભર્તૃપુત્રાં-
-સ્ત્યક્ત્વા શ્રુત્વા સમીપે વિચકિતનયનાઃ સપ્રમોદાઃ સ્વગેહે |
રંતું રાસાદિલીલા મનસિજદલિતા વેણુનાદં ચ રમ્યં
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૬ ||
યસ્મિન્ દૃષ્ટે સમસ્તે જગતિ યુવતયઃ પ્રાણનાથવ્રતા યા-
-સ્તા અપ્યેવં હિ નૂનં કિમપિ ચ હૃદયે કામભાવં દધત્યઃ |
તત્સ્નેહાબ્ધિં વપુશ્ચેદવિદિતધરણૌ સૂર્યબિંબસ્વરૂપાઃ
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૭ ||
યઃ સ્વીયે ગોકુલેઽસ્મિન્વિદિતનિજકુલોદ્ભૂતબાલૈઃ સમેતો
માતર્યેવં ચકાર પ્રસૃતતમગુણાન્ બાલલીલાવિલાસાન્ |
હત્વા વત્સપ્રલંબદ્વિવિદબકખરાન્ ગોપબૃંદં જુગોપ
કૃષ્ણો રાધાસમેતો વિલસતુ હૃદયે સોઽસ્મદીયે સદૈવ || ૮ ||
કૃષ્ણારાધાષ્ટકં પ્રાતરુત્થાય પ્રપઠેન્નરઃ |
ય એવં સર્વદા નૂનં સ પ્રાપ્નોતિ પરાં ગતિમ્ || ૯ ||
ઇતિ શ્રીરઘુનાથચાર્ય વિરચિતં શ્રીરાધાકૃષ્ણાષ્ટકમ્ |