യഃ ശ്രീഗോവർധനാദ്രിം സകലസുരപതിം ത്രസ്തഗോഗോപവൃന്ദം
സ്വീയം സംരക്ഷിതും ചേത്യമരസുഖകരം മോഹയൻ സന്ദധാര |
തന്മാനം ഖണ്ഡയിത്വാ വിജിതരിപുകുലോ നീലധാരാധരാഭഃ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 1 ||
യം ദൃഷ്ട്വാ കംസഭൂപഃ സ്വകൃതകൃതിമഹോ സംസ്മരന്മന്ത്രിവര്യാൻ
കിം വാഽപൂർവം മയേദം കൃതമിതി വചനം ദുഃഖിതഃ പ്രത്യുവാച |
ആജ്ഞപ്തോ നാരദേന സ്മിതയുതവദനഃ പൂരയൻ സർവകാമാൻ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 2 ||
യേന പ്രോദ്യത് പ്രതാപാ നൃപതികുലഭവാഃ പാണ്ഡവാഃ കൗരവാബ്ധിം
തീർത്വാ പാരം തദീയം ജഗദഖിലനൃണാം ദുസ്തരം ചേതി ജഗ്മുഃ |
തത്പത്നീചീരവൃദ്ധിപ്രവിദിതമഹിമാ ഭൂതലേ ഭൂപതീശഃ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 3 ||
യസ്മൈ ചോദ്ധൃത്യ പാത്രാദ്ദധിയുതനവനീതം കരൈർഗോപികാഭി-
-ര്ദത്തം തദ്ഭാവപൂർതൗ വിനിഹിതഹൃദയഃ സത്യമേവം തിരോധാത് |
മുക്താഗുഞ്ജാവളീഭിഃ പ്രചുരതമരുചിഃ കുണ്ഡലാക്രാന്തഗണ്ഡഃ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 4 ||
യസ്മാദ്വിശ്വാഭിരാമാദിഹ ജനനവിധൗ സർവനന്ദാദിഗോപാഃ
സംസാരാർതേർവിമുക്താഃ സകലസുഖകരാഃ സമ്പദഃ പ്രാപുരേവ |
ഇത്ഥം പൂർണേന്ദുവക്ത്രഃ കലകമലദൃശഃ സ്വീയജന്മ സ്തുവന്തഃ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 5 ||
യസ്യ ശ്രീനന്ദസൂനോർവ്രജയുവതിജനാശ്ചാഗതാ ഭർതൃപുത്രാം-
-സ്ത്യക്ത്വാ ശ്രുത്വാ സമീപേ വിചകിതനയനാഃ സപ്രമോദാഃ സ്വഗേഹേ |
രന്തും രാസാദിലീലാ മനസിജദലിതാ വേണുനാദം ച രമ്യം
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 6 ||
യസ്മിൻ ദൃഷ്ടേ സമസ്തേ ജഗതി യുവതയഃ പ്രാണനാഥവ്രതാ യാ-
-സ്താ അപ്യേവം ഹി നൂനം കിമപി ച ഹൃദയേ കാമഭാവം ദധത്യഃ |
തത്സ്നേഹാബ്ധിം വപുശ്ചേദവിദിതധരണൗ സൂര്യബിംബസ്വരൂപാഃ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 7 ||
യഃ സ്വീയേ ഗോകുലേഽസ്മിന്വിദിതനിജകുലോദ്ഭൂതബാലൈഃ സമേതോ
മാതര്യേവം ചകാര പ്രസൃതതമഗുണാൻ ബാലലീലാവിലാസാൻ |
ഹത്വാ വത്സപ്രലംബദ്വിവിദബകഖരാൻ ഗോപബൃന്ദം ജുഗോപ
കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ || 8 ||
കൃഷ്ണാരാധാഷ്ടകം പ്രാതരുത്ഥായ പ്രപഠേന്നരഃ |
യ ഏവം സർവദാ നൂനം സ പ്രാപ്നോതി പരാം ഗതിം || 9 ||
ഇതി ശ്രീരഘുനാഥചാര്യ വിരചിതം ശ്രീരാധാകൃഷ്ണാഷ്ടകം |