ଯଃ ଶ୍ରୀଗୋବର୍ଧନାଦ୍ରିଂ ସକଲସୁରପତିଂ ତ୍ରସ୍ତଗୋଗୋପବୃନ୍ଦଂ
ସ୍ୱୀୟଂ ସଂରକ୍ଷିତୁଂ ଚେତ୍ୟମରସୁଖକରଂ ମୋହୟନ୍ ସନ୍ଦଧାର |
ତନ୍ମାନଂ ଖଣ୍ଡୟିତ୍ୱା ବିଜିତରିପୁକୁଲୋ ନୀଲଧାରାଧରାଭଃ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୧ ||
ଯଂ ଦୃଷ୍ଟ୍ୱା କଂସଭୂପଃ ସ୍ୱକୃତକୃତିମହୋ ସଂସ୍ମରନ୍ମନ୍ତ୍ରିବର୍ୟାନ୍
କିଂ ବାଽପୂର୍ୱଂ ମୟେଦଂ କୃତମିତି ବଚନଂ ଦୁଃଖିତଃ ପ୍ରତ୍ୟୁବାଚ |
ଆଜ୍ଞପ୍ତୋ ନାରଦେନ ସ୍ମିତୟୁତବଦନଃ ପୂରୟନ୍ ସର୍ୱକାମାନ୍
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୨ ||
ଯେନ ପ୍ରୋଦ୍ୟତ୍ ପ୍ରତାପା ନୃପତିକୁଲଭବାଃ ପାଣ୍ଡବାଃ କୌରବାବ୍ଧିଂ
ତୀର୍ତ୍ୱା ପାରଂ ତଦୀୟଂ ଜଗଦଖିଲନୃଣାଂ ଦୁସ୍ତରଂ ଚେତି ଜଗ୍ମୁଃ |
ତତ୍ପତ୍ନୀଚୀରବୃଦ୍ଧିପ୍ରବିଦିତମହିମା ଭୂତଲେ ଭୂପତୀଶଃ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୩ ||
ଯସ୍ମୈ ଚୋଦ୍ଧୃତ୍ୟ ପାତ୍ରାଦ୍ଦଧିୟୁତନବନୀତଂ କରୈର୍ଗୋପିକାଭି-
-ର୍ଦତ୍ତଂ ତଦ୍ଭାବପୂର୍ତୌ ବିନିହିତହୃଦୟଃ ସତ୍ୟମେବଂ ତିରୋଧାତ୍ |
ମୁକ୍ତାଗୁଞ୍ଜାବଳୀଭିଃ ପ୍ରଚୁରତମରୁଚିଃ କୁଣ୍ଡଲାକ୍ରାନ୍ତଗଣ୍ଡଃ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୪ ||
ଯସ୍ମାଦ୍ୱିଶ୍ୱାଭିରାମାଦିହ ଜନନବିଧୌ ସର୍ୱନନ୍ଦାଦିଗୋପାଃ
ସଂସାରାର୍ତେର୍ୱିମୁକ୍ତାଃ ସକଲସୁଖକରାଃ ସମ୍ପଦଃ ପ୍ରାପୁରେବ |
ଇତ୍ଥଂ ପୂର୍ଣେନ୍ଦୁବକ୍ତ୍ରଃ କଲକମଲଦୃଶଃ ସ୍ୱୀୟଜନ୍ମ ସ୍ତୁବନ୍ତଃ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୫ ||
ଯସ୍ୟ ଶ୍ରୀନନ୍ଦସୂନୋର୍ୱ୍ରଜୟୁବତିଜନାଶ୍ଚାଗତା ଭର୍ତୃପୁତ୍ରାଂ-
-ସ୍ତ୍ୟକ୍ତ୍ୱା ଶ୍ରୁତ୍ୱା ସମୀପେ ବିଚକିତନୟନାଃ ସପ୍ରମୋଦାଃ ସ୍ୱଗେହେ |
ରନ୍ତୁଂ ରାସାଦିଲୀଲା ମନସିଜଦଲିତା ବେଣୁନାଦଂ ଚ ରମ୍ୟଂ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୬ ||
ଯସ୍ମିନ୍ ଦୃଷ୍ଟେ ସମସ୍ତେ ଜଗତି ଯୁବତୟଃ ପ୍ରାଣନାଥବ୍ରତା ଯା-
-ସ୍ତା ଅପ୍ୟେବଂ ହି ନୂନଂ କିମପି ଚ ହୃଦୟେ କାମଭାବଂ ଦଧତ୍ୟଃ |
ତତ୍ସ୍ନେହାବ୍ଧିଂ ବପୁଶ୍ଚେଦବିଦିତଧରଣୌ ସୂର୍ୟବିମ୍ବସ୍ୱରୂପାଃ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୭ ||
ଯଃ ସ୍ୱୀୟେ ଗୋକୁଲେଽସ୍ମିନ୍ୱିଦିତନିଜକୁଲୋଦ୍ଭୂତବାଲୈଃ ସମେତୋ
ମାତର୍ୟେବଂ ଚକାର ପ୍ରସୃତତମଗୁଣାନ୍ ବାଲଲୀଲାବିଲାସାନ୍ |
ହତ୍ୱା ବତ୍ସପ୍ରଲମ୍ବଦ୍ୱିବିଦବକଖରାନ୍ ଗୋପବୃନ୍ଦଂ ଜୁଗୋପ
କୃଷ୍ଣୋ ରାଧାସମେତୋ ବିଲସତୁ ହୃଦୟେ ସୋଽସ୍ମଦୀୟେ ସଦୈବ || ୮ ||
କୃଷ୍ଣାରାଧାଷ୍ଟକଂ ପ୍ରାତରୁତ୍ଥାୟ ପ୍ରପଠେନ୍ନରଃ |
ଯ ଏବଂ ସର୍ୱଦା ନୂନଂ ସ ପ୍ରାପ୍ନୋତି ପରାଂ ଗତିମ୍ || ୯ ||
ଇତି ଶ୍ରୀରଘୁନାଥଚାର୍ୟ ବିରଚିତଂ ଶ୍ରୀରାଧାକୃଷ୍ଣାଷ୍ଟକମ୍ |